OEKUSI, 29 Outubru 2025 (TATOLI) – Diresaun Rejionál Edukasaun no Solidariedade Sosiál Rejiaun Administrativa Espesiál Oekusi Ambeno (RAEOA), la rejista estudante finalista atu partisipa iha ezame segunda xamada tanba maioria partisipa iha ezame nasionál no lokál.
Notísia relevante:Espera estudante sei hatudu rezultadu di’ak iha ezame nasionál
Prezidente Komisaun ba Ezame Nasionál iha Oekusi, Damiaun da Costa, hateten, ezame nasionál no lokál iha Rejiaun Oekusi la’o di’ak tanba la rejista asidente no dezastre ba estudante sira, nune’e parte edukasaun mós la rejista estudante ida atu partisipa iha ezame segunda xamada.
“Ezame nasionál 2025 nian ba ensinu báziku, sekundáriu jerál no tékniku vokasionál, laiha estudante ida atu partisipa ba ezame segunda xamada, tanba ensinu sekundáriu iha alunu ida, maibé nia sai antes iha segundu trismestre, nia prienxe kritériu atu tama ba ezame nasionál maibé, estudante rasik mak la marka prezensa, entaun relatóriu husi eskola hotu mai Diresaun Edukasaun ba tinan ne’e maioria partisipa hotu. Ita agradese tanba laiha asidente ruma iha ámbitu ezame,” nia hateten ba Ajénsia TATOLI iha Oekusi, ohin.
Diretór EBC 01 de Maio Palaban, Frederico Sila, nu’udar Koordenadór Ezame Nasionál ba Ensinu Báziku iha Oekusi, informa, estudante atu tuir ezame nasionál no lokál ba tinan ne’e, 1.602, mai husi EBC 12 inklui privada rua (2).
“Ne’ebé, husi 1.602 ne’e, sira partisipa hotu. Katak, ezame nasionál no lokál ita liu daudaun ona ne’e, la’o ho susesu,” nia hateten.
Notísia relevante:Edukasaun Oekusi suspende atividade letiva hodi konsentra ba ezame nasionál
Entretantu, totál estudante ne’ebé atu partisipa iha ezame nasionál loron 20 Outubru ne’e hamutuk 3.112, komposta husi Ensinu Báziku Sentrál (EBC) 1.602, Eskola Sekundáriu Jerál (ESG, sigla portugés) 1.062 husi siénsia téknolojia 554 no siénsia sosiál 508, Ensinu Tékniku Vokasionál 448.
Jornalista: Abílio Elo Nini
Editór: Rafael Ximenes de A. Belo
