DILI, 29 Outubru 2025 (TATOLI)—Ekipa Feto Asosiasaun Futeból Aileu garante sai kampiaun iha kompetisaun Kopa Juveníl Sub-17 tinan 2025.
Treinadór Asosiasaun Futeból Aileu, Domingos dos Santos Silva, esplika esperansa ne’e mosu bainhira iha meiu finál kontra ekipa futeból husi Baukau manán ho skor boot nune’e ekipa nafatin halo preparasaun másima iha jogu finál kontra Ermera hodi sai kampiaun iha tinan ne’e.
“Hafoin kompete iha nivel rejionál, ha’u garante ona katak ami sei sai kampiaun iha Kopa Juveníl Sub-17,” Treinadór Aileu informa ba TATOLI iha Estádiu Munisipál Dili, Kuarta ne’e.
Notísia relevante: Ekipa feto husi Aileu hakat bá finál Kopa Juvenil Sub-17
Treinadór ho naran koñesidu Santos relata, atu atinje esperansa sai kampiaun, nia parte sei prepara tátika, estratéjia hafoin observa direta jogu husi Ermera ne’ebé manán Dili Leste iha Estádiu Munisipál Dili.
Asosiasaun Futeból Munisipál Aileu rasik hakat bá finál Kopa Juveníl Sub-17 hafoin sai kampiaun iha nivel rejionál no jogu meiu finál iha nasionál halakon Asosiasaun Futeból Baukau ho skor 7-1.
Entretantu, iha finál ekipa Aileu hasoru Ermera iha-ne’ebé tuir kalendáriu sei hala’o iha Estádiu Munisipál Dili, loron-Sesta (31/10/2025).
Jornalista: Natalino Belo
Editór: Xisto Freitas da Piedade
