DILI, 30 Outubru 2025 (TATOLI)-Primeiru-Ministru (PM), Xanana Gusmão, sente impresionadu hodi hamonu matabeen iha ámbitu Simeira Asosiasaun Nasaun Sudeste Aziátiku (ASEAN) ba da-47 no serimónia adezaun Timor-Leste sai membru plenu ASEAN ba da-11, iha Kuala Lumpur, Malázia.
Xefe Governu sente impresionadu, tanba nasaun membru hotu-hotu simu ho kontente no ho prezensa husi líder internasionál hanesan Sekretáriu-Jerál Organizasaun Nasaun Unida (ONU), António Guterres, Prezidente Konsellu Uniaun Europeia, António Costa, Prezidente Repúblika Brazíl, Luiz Inácio Lula, no reprezentante organizasaun no husi rai oioin.
“Ne’ebé sente impresionadu, tanba ha’u nunka imajina ida-ne’e. Hanoin to’o bá ne’ebá, iha Submit [Simeira] nia laran, ha’u la espera serimónia”, Xanana haktuir ba jornalista sira hafoin ramata enkontru semanál ho Prezidente Repúblika, Ramos-Horta, iha Palásiu Prezidensiál, Aitarak-Laran, ohin.
Nune’e Xanana sente reprezenta ema hotu ne’ebé mate ona hodi luta ba libertasaun país ida nian. “Sente hodi sira hotu ne’ebé mate tiha ona, sente ita hakat tan dalan ida, tanba prosesu naruk iha tinan 2011, maibé ita mós iha problema iha ne’e, ita tenke rezolve, haree vizaun oinsá”, nia dehan.
Lembra katak hafoin serimónia asinatura deklarasaun adezaun Timor-Leste ba ASEAN no Serimónia Abertura ASEAN ba da-47 ne’ebé hala’o iha Sentru Konvensaun Kuala Lumpur (KLCC), Malázia, iha loron 26 Outubru, PM Xanana hato’o, liuhusi konferénsia imprensa, nia agradesimentu ba Estadu-membru ASEAN, parseiru esternu sira, no povu timoroan, ba sira-nia apoiu hodi halo nasaun ne’e nia aspirasaun ne’ebé hein kle’ur sai realidade.
Xanana lori Governu no povu Timor-Leste nia naran hato’o apresiasaun sinsera ba membru ASEAN tomak no parseiru sira ba sira-nia tulun no amizade ne’ebé metin. “Hamutuk ita hein atu harii ida ne’ebé pasífiku, iha ligasaun no Sudeste Aziátiku ne’ebé reziliente no unidu”, Xanana deklara foin lalais ne’e.
Notísia relevante: PM Xanana : Agradese ba povu Malázia no Estadu Membru ASEAN
Jornalista: Nelson de Sousa
Editora: Maria Auxiliadora
