OEKUSI, 06 Novembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Departamentu Serbisu Água Saneamentu (DSAS) akompaña hosi Diresaun Rejionál Infraestrutura (DRI), kuarta ne’e, hatuur fatuk inan projetu konstrusaun kanalizasaun sistema bee-moos, ne’ebé utiliza bomba no gravitasaun hodi fasilita bee ba komunidade uma-kain 72 iha aldeia Fatukenfua, suku Usitaku, sub-rejiaun Nitibe.
Projetu konstrusaun kanalizasaun sistema bee-moos ne’e, ezekuta husi kompañia lokál Cae Neno Unipesoál Lda, ho valór orsamentu $57,139.52 ho nia medida obra 5×5 no aas metru 2,50, durasaun serbisu fulan neen.
Notísia relevante:José Anunu inaugura bee-moos fasilita abitante 300-resin iha suku Usitaku
Xefe Departamentu Serbisu Água no Saneamentu, Yeosep Ili, informa, projetu ne’e ho serbisu fulan neen, espera kompañia bele kumpre, nune’e komunidade sira bele asesu ona bee-moos.
“Maski tinan-2025 besik atu ramata ona, maibe serbisu sei la’o hela, tanba ida-ne’e atividade konstrusaun kanalizasaun bee ne’e importante, hodi bele atende komunidade sira, tanba ne’e, ha’u rekomenda ba kompañia hodi aselera kontratu no servisu ne’e to’o hotu ho di’ak, durante fulan neen,” nia hateten perante lansamentu fatuk dahuluk iha suku Usitaku.
Iha biban ne’e, nia sujere ba komunidade sira, Autoridade lokál atu koopera ho kompañia, karik konstrusaun afeta ba pátrimoniu komunidade nian.
“Obra ne’e nia intensaun atu fasilita inan-aman sira iha aldeia Fatukenfua, ne’ebé bainhira kuandu iha naksalak ruma, presiza ko’alia didi’ak ho kompañia, kria kooperasaun ho koordenasaun di’ak, atu nune’e projetu ne’e bele finaliza lalais, depois komunidade sira bele utiliza ona,” nia rekomenda.
Iha fatin hanesan, Diretór Kompania Cae Neno Unipesoál Lda, Costancio Neno Caet, agradese Governu liuhusi Autoridade ne’ebe depozita konfiansa, hodi ezekuta projetu konstrusaun kanalizasaun sistema bee-moos utiliza bomba no gravitasaun iha bairu Fatukenfua ne’e.
“Hanesan timoroan prontu atu serbisu, ne’ebe sei serbisu tuir item ne’ebé Governu fó mai ami. Ha’u labele promete katak durante fulan neen halo hotu ka projetu ne’e prontu ona, maibé ami sei esforsu, hodi fulan rua ka tolu tenke halo prontu, tanba agora besik udan ona, entaun aselera serbisu, nune’e komunidade sira bele asesu ona ba bee-moos, tanba durante ne’e, komunidade sira iha Fatukenfua sira susar los atu asesu ba bee-moos,” nia promete.
Nune’e mós, Reprezentante Xefe Suku Usitaco, Antaon Sufa Coa, agradese Autoridade RAEOA tanba rona ona povu Fatukenfua sira-nia halerik ba bee-moos.
“Durante ne’e, ita-nia komunidade sira ba buka bee-moos iha bee-matan sira mak konsumu, ho ida-ne’e ami agradese ba Autoridade RAEOA liuhosi DSAS ne’ebé ohin mai halo lansamentu ona, bainhira finaliza ona, ba oin ami sei asesu ona ho distánsia besik,” nia hateten.
Jornalista: Abílio Elo Nini
Editór: Rafael Ximenes de A. Belo
