KOVALIMA,10 Novembru 2025 (TATOLI)- Ministériu Juventude, Desportu, Arte no Kultura (MJDAK) servisu hamutuk ho Sentru Juventude Kovalima (CJC) aloka orsamentu $4.700 hodi komemora loron nasionál 12 Novembru ba dala-34 no loron nasionál juventude ba dala-20 iha munisipiu Kovalima.
Diretór Ezekutivu Centru Juventu Kovalima, Julio Fereira, informa orsamentu ne’ebé maka MJDAK koloka uza hodi koloka ba postu administrativu hitu, nune’e kada postu administrativu sei hetan orsamentu $600.
“Komemorasaun loron Nasionál Juventude no 12 Novembru kada postu administrativu hala’o atividade ne’ebé maka la hanesan. Hanesan husi postu administrativu Suai maka ita sei hala’o atividade sira hanesan limpeza, semináriu, sunu lilin no tau ai-funan ba saoudozu sira nia rate”, Julio Fereira dehan ba jornalista sira iha resintu AMC, ohin.
Atividade semináriu sei konvida oradór husi pontu vokál MJDAK munisípiu Kovalima, Dewan Solidaritas no Mate Restu 12 Novembru hodi konta istória kona-ba Masakre Santa Cruz 1991 ba alunu ensinu sekundáriu.
Orsamentu ne’ebé maka Governu liuhusi Ministériu Juventude, Desportu, Arte no Kultura (MJDAK) koloka atu finansia atividade ne’ebé maka atu hala’o hodi komemora loron nasionál juventude no 12 Novembru ho nia tema “Ha’u Timor-oan orgullu ho ha’u nia nasaun”.
Notisia relevante: Governu prevee rihun $19-resin ba komemorasaun Loron Nasionál Juventude
Jornalista: Celestina Teles
Editór : Florencio Miranda Ximenes
