DILI, 11 Novembru 2025 (TATOLI)—Komisaun Funsaun Públika (CFP-sigla portugeza) liuhusi Komisáriu Asuntu Dixiplinár, Agapito da Conceição hateten kazu asédiu sexuál iha Universidade Nasionál Timor Lorosa’e (UNTL) daudaun ne’e halo abertura ona ba prosesu investigasaun.
Nia dehan, kona-ba prosesu kazu asédiu sexuál iha UNTL, parte dixiplinár UNTL no Ministériu Ensinu Superiór Siénsia no Kultura (MESSK) hato’o ona evidénsia mai KFP.
“Ha’u hasai ona despaxu hodi halo abertura ba prosesu dixiplinár. Tanba ne’e, ha’u entrega ona ba diresaun ida-ne’ebé responsabiliza ba dixiplina, atu tun ba terrenu hodi halo investigasaun ba vítima, akuzadu no sasin sira,” Komisáriu Agapito de Conceição dehan ba jornalistasira iha nia kna’ar fatin, Matadouru, Tersa ne’e.
Tuir nia katak seidauk bele suspende akuzadu tanba sei hein investigasaun ne’ebé kle’an.
Notísia relevante: SEI fó apresiasaun ba estudante ne’ebé brani ko’alia sai asédiu sexuál
Kona-ba pena, Agapito informa, depende ba kazu tanba KFP iha pena sira hanesan demisaun no suspensaun.
“Maibé se ida-ne’e mak krime, ami sei enkamiña ba Ministériu Públiku no ba administrativu ami bele ona halo desizaun demisaun ho suspensaun iha atividade, konforme grau ida-ne’ebé mak komete,” Agapito subliña.
“Ita presiza sasin ne’ebé nia justifikasaun kredivel, atu ita bele foti desizaun, tanba asédiu sexuál parese sei to’o iha tribunál, no kazu ne’e grave sei iha demisaun ka bele hetan suspensaun,” Agapito hateten.
Nia hatutan, UNTL submete ona dadus, tanba ne’e sira sei halo konfirmasaun hodi halo analiza kona-ba pena saida mak sei fó ba akuzadu.
Ligadu ho saláriu akuzadu nia, nia dehan, bainhira tama ona ba investigasaun akuzadu nia saláriu sei halo suspensaun.
Komisáriu Agapito relata, durante ne’e Komisaun Funsaun Públika rejistu ona kazu asédiu sexuál hamutuk 26. Husi kazu 26 ne’e, maiória komete husi manorin sira.
“Husi kazu ne’e mós, akuzadu balun ami halo ona demisaun no balun suspensaun, maibé barak mak ami hapara tiha husi sira-nia atividade sira,” nia tenik.
Nia dehan, parte KFP sempre iha kontaktu ho liña ministeriál sira hodi halo diseminasaun funsionáriu ministériu sira kona-ba asédiu sexuál.
“Ami mós halo desiminasaun informasaun kona-ba asédiu sexuál la’ós iha nasionál de’it, maibé to’o munisípiu sira, liga ba saida mak asédiu sexuál. Ezemplu, bainhira ita kaer ema nia kabas ida-ne’e tama ona ba asédiu sexuál, maibé ida grave ne’e mak kontaktu direta,” nia akresenta.
Nia apela ba sidadaun sira bele halo keixa, bainhira funsionáriu ajente administrasaun públika ida komete asédiu sexual.
Jornalista: Osória Marques
Editór: Xisto Freitas da Piedade
