DILI, 13 Novembru 2025 (TATOLI)-Parlamentu Nasionál (PN) nia aprova proposta Orsamentu Jerál Estadu (OJE) ba tinan fiskál 2026 ho montante $19.073.404 iha faze espesialidade.
Deputadu sira aprova ho votu a favór 41, kontra 0, no abstensaun 23 husi FRETILIN no Partidu Libertasaun Populár (PLP).
“Parlamentu nia orsamentu mós ita vota abstensaun. Ne’ebé, orsamentu Parlamentu aprovadu”, Prezidente Parlamentu Nasionál, Maria Fernanda Lay, fó sai iha sala plenária, ohin.
Verba ne’e sei finansia programa prioridade mak hanesan fomenta relasaun internasionál no kooperasaun parlamentár, garante ezersísiu funsaun konstitusionál Parlamentu, promove kultura abertura no transparénsia iha Parlamentu no dezenvolvimentu institusionál.
Proposta orsamentu ne’e aloka ba saláriu no vensimentu $11.217.005, bens no serbisu $6.242.298, transferénsia públika $955.180, kapitál menór $658.921 no kapitál dezenvolvimentu zero.
Verba ba saláriu no vensimentu ne’e hodi selu saláriu ba deputadu, funsionáriu, asesór nasionál no internasionál sira.
Despeza ba bens no serbisu utiliza bá viajen estranjeiru, viajen lokál, estudu komparativu, fiskalizasaun komisaun, realiza atividade semináriu, prémiu Max Stahl, apoiu serbisu komisaun rekrutamentu ba prokuradór no juís, servisu sekretariadu, Grupu Feto Parlamentár Timor-Leste (GMPTL, sigla portugés), hodi realiza atividade komemora loron família, loron internasionál rurál no nasionál, kampaña 16 loron ativizmu violénsia kontra feto no labarik feto.
Inklui servisu jerál ba kombustivel, manutensaun karreta, manutensaun edifísiu, materiál eskritóriu, limpeza no seluk tan. Ba transferénsia públika hodi finansia subvensaun anuál ba bankada parlamentár sira ho seluk tan.
Kapitál menór atu sosa ekipamentu information technology, eletróniku, ekipamentu komunikasaun, seguransa, melloramentu ba servedór no akizisaun ekipamentu sira seluk.
Notísia relevante: PN aprova millaun $12.175 ba Prezidénsia Repúblika
Jornalista: Nelson de Sousa
Editora: Maria Auxiliadora
