DILI, 17 Novembru 2025 (TATOLI)—Ekipa futeból femininu AD SLB Laulara dere Vale de Lahane (VDL) Football Club ho skor 14-1 iha jogu jornada dahaat primeira divizaun Liga Futeból Femininu Timor-Leste (LFFTL) ne’ebé hala’o iha Estádiu Munisipál Dili, Domingu (16/11/2025).
AD SLB Laulara ne’ebé konsideradu ekipa forte hatudu jogu kualidade, nune’e iha parte dahuluk rezulta ho tabela skor 3-1 ne’ebé prodús liuhosi jogadora Astari Songe iha minutu 13, Júlia Belo minutu 21 no Natacia Alves iha minutu 23, enkuantu VDL responde golu husi jogadora Lúcia Ximenes iha minutu 25.
Notísia relevante: AD SLB lidera tabela klasifikasaun LFFTL troka Maudoko FC
Jogu parte daruak, AD SLB hasa’e liután ritmu atake nune’e aumenta tan golu 11 ne’ebé enxe husi jogadora sira hanesan Elvira da Silva iha minutu 49 no 75, golu lima husi Maria Conceição iha minutu 55, 56, 84, 87 no 88, Astari Songe iha minutu 54 liuhosi penalidade, 64 no 72 inklui Vanessa Fernandes iha minutu 59.
Ho rezultadu jogu entre ekipa rua referida, rezulta AD SLB iha pozisaun datoluk ho pontu sanulu (10) hafoin manán tolu (3) no impata ida (1), enkuantu VDL FC okupa iha pozisaun daualu (8o) ho pontu tolu (3), rezultadu husi manán ida (1) no derrota tolu (3).
Jornalista: Natalino Belo
Editór: Xisto Freitas da Piedade
