OEKUSI, 17 Novembru 2025 (TATOLI) – Komisaun Nasionál Eleisaun (CNE, sigla portugés), segunda ohin, realiza edukasaun sívika ho métodu debate lideransa polítika lokál ba Partidu Polítiku lima, ne’ebé hetan asentu iha uma fukun Parlamentu Nasionál (PN) ho tema ‘Ita prontu ba Eleisaun Munisipál’ hodi konsolida no garante dezenvolvimentu sustentavel iha Rejiaun Administrativa Espesiál Oekusi Ambeno (RAEOA).
Debate públiku ne’e realiza tanba liuhusi kooperasaun CNE ho Rádiu Televizaun Timor-Leste, Empreza Públiku (RTTL,EP), ne’ebé lidera husi moderadór Evangelino de Jesus Fátima, ba partidu lima ne’ebé hetan asentu iha uma fukun Parlamentu Nasionál, mak hanesan partidu CNRT, FRETILIN, KHUNTO, PD no PLP.
Notísia relevante:CNE realiza debate públiku ba partidu polítiku lima iha Vikeke
Prezidente CNE, José Belo, hateten, objetivu husi debate públiku ne’e, atu hakbesik ba estrutura partidu polítiku sira iha nível munisípiu atu introdús misaun no vizaun ba eleitór sira iha baze.
“Debate ne’e labele akontese de’it iha nasionál, tanba semak besikliu eleitór sira iha baze, atu esplika sira-nia vizaun ho misaun no komportamentu ba koordenadór partidu polítiku sira ho estrutura iha nível munisípiu, tanba eleisaun baze eleitorál iha baze, tan ne’e presiza mós ko’alia kona-ba sira-nia hanoin, nune’e bele kompleta lideransa sira iha nasionál, tan ne’e mak mosu edukasaun sívika ida, ita introdús debate públiku, ida- ne’e primeira-ves CNE realiza ba munisipíu sira, ho topíku kada munisipíu lahanesan,” nia hateten iha salaun edukasaun Oekusi, ohin.
Nia informa, CNE ho RTTL,EP fasilita de’it palku polítiku ne’e ba partidu lima, hodi espresa hanoin tomak ne’ebé durante ne’e organiza ho vontade ne’ebé iha, tan ne’e liuhusi oportunidade ne’e, bele hatudu no dehan ba públiku atu avália.
“Tanba ita-nia nasaun presiza lideransa, lideransa ne’e harii husi komportamentu, hatene povu nia hakarak, tanba laiha sidadaun seluk atu konkorre iha eleisaun, maibé só Partidu Polítiku sira, mak iha absoluta hodi bele konkorre iha festa demokrasia ne’ebé realiza kada tinan lima dala ida,” nia afirma.
Notísia relevante:AFP-CNE realiza kompetisaun diskursu públiku ba feto potensiál iha Vikeke
Iha biban ne’e, Prezidente Autoridade RAEOA, Régio da Cruz Salu, konsidera debate interrativu ne’e sei fó impaktu pozitivu, tanba fó oportunidade ba lideránsa lokál sira atu espresa vizaun no misaun Partidu Polítiku nian ba eleitór sira iha nível munisipíu.
“Ida-ne’e mak kultura foun Oekusi, ambiénte foun tenke akontese, CNE organiza debate ne’e importante, tanba ami mai ejiste iha ba líder sira, agora líder sira tenki ko’alia, atu lori Oekusi ba ne’ebé, maibé ida-ne’e mak loos, tanba durante ita hanoin hela, karik seidauk hanoin maibé ho prezensa debatu interrativu ne’e atu ema ko’alia ba malu, tanba ita hotu líder ita tenke hato’o ita-nia vizaun no misaun ba eleitór sira, labele mosu de’it iha palku kampaña, maibé ho périodu hanesan ne’e, ita tenke realiza, ne’ebé ita espera debate bele iha kontinuasaun ba futuru,” nia hateten.
Notísia relevante:CNE nota eleisaun órgaun suku iha Kutete-Monemeko la’o di’ak
Entretantu, debatedór na’in-sira husi Partidu Polítiku lima, mak hanesan, Vincencio Cono ho Jecafriadu Afulit Coa reprezenta partidu CNRT, José Eta ho Agustinho Elo reprezenta partidu FRETILIN, Martinho do Nascimentu Obe ho Juventus Elo reprezenta partidu KHUNTO, Carlos de Almeida ho Miguel da Cruz Gama reprezenta partidu PD no husi partidu PLP reprezenta husi Martinho Abani Elo ho Veronika Oematan.
Jornalista: Abílio Elo Nini
Editór: Rafael Ximenes de A. Belo
