DILI, 19 Novembru 2025 (TATOLI) – Parlamentu Nasionál aprova proposta Orsamentu Jerál Estadu (OJE) tinan fiskál 2026 ba Ministériu Agrikultura, Pekuária, Peska no Floresta (MAPPF) ho montante $22,200.883 iha faze espesialidade ho votu a-favór 42, kontra 0 no abstensaun 23.
Orsamentu ne’e hodi aloka ba saláriu no vensimentu $6.911.859, bens no serbisu $10.548,842, transferénsia públika $30.600, kapitál menór $4.121.293 no kapitál dezenvolvimentu $588.289.
Tuir dokumentu livru OJE MAPPF iha Programa Funsionamentu no Dezenvolvimentu Instituisionál hetan alokasaun $8.020.694 atu implementa subprograma rua no atividade 13.
Programa Agrikultura, Ortikultura, Kafé no Planta Industriál no Anuál hetan $9.822.540 atu implementa subprograma ualu; forsa traballu ba prestasaun serbisu iha terrenu, produsaun no produtividade produtu agrikultura no ortikultura, produsaun no produtividade produtu kafé no planta industriál no anuál.
Dezenvolvimentu infraestrutura agrikultura, ortikultura, kafé no planta industriál anuál, investigasaun agríkola iha área agrikultura ortikultura, kafé no planta industriál anuál, revitalizasaun serbisu estensaun agrikula, abastasimentu sustentável bee no agrikultura ho mellora efisiénsia iha uzu bee no nia atividade 26.
Programa Pekuária, Veterinária no Teknolójia iha $1.630.993 hodi implementa sub-rograma haat; forsa traballu ba prestasaun serbisu iha terrenu, produsaun no produtividade produtu animál, kontrola moras animál, industrializasaun no komersializasaun produtu animál ho nia atividade ualu.
Programa Peska, Akikultura no Jestaun Rekursu Umanu Akuátiku iha alokasaun $1.448.768 hodi implementa subprograma ualu; produsaun no produtividade peskeira no akuakultura, kontrola saúde peska, ambiente akuátiku ba akuakultura.
Dezenvolvimentu infraestrutura peska no akikultura, investigasaun espésie akuátiku, industrializasaun no komersializasaun peska mariña, konservasaun no jestaun rekursu mariñu no área kosteira, forsa traballu ba prestasaun serbisu iha terrenu ho ninia atividade 13.
Programa Jestaun Sustentável Rekursu Floresta iha alokasaun $1.277.888 hodi implementa subprograma haat; produsaun no jestaun produtu floresta, konservasaun no protesaun rekursu floresta, industrializasaun no komersializasaun produtu floresta, forsa traballu ba prestasaun serbisu iha terenu no ninia atividade 17.
Proposta adisionál pasa
Durante diskusaun espesialidade deputadu husi CNRT, PD aprezenta proposta rua; dahuluk propoen hasai $78.986 iha títulu MAPPF ho Programa Agrikultura, Ortikultura, Kafé no Ai-horis Industriál no Anuál hodi realoka nafatin ba MAPPF ho Programa hanesan atu halo akizisaun ba tratór.
Proposta daruak propoen hasai rihun $250 husi Dotasaun Jerál Estadu iha Programa Inkluzaun Sosiál iha atividade pensaun eis-titulár ka pensaun vitalísia hodi tau fali iha MAPPF ho Programa Funsionamentu no Dezenvolvimentu Instituisionál atividade jestaun rekursu umanu.
Deputadu CNRT, Ricardo Baptista, nu’udar proponente justifika tanba ministériu hetan redusaun kuaze 30% iha saláriu no vensimentu, ida-ne’e sei afeta kontratu funsionáriu kazuál destaka iha sentru viveiru iha territóriu, nune’e presiza verba referida.
Ministru Agrikultura, Peska, Pekuária no Floresta, Marcos da Cruz, aseita proposta rua ne’e. Nune’e hakat votasaun iha plenária proposta rua ne’e pasa.
Ho adisionál rihun $250 ministériu sei iha aumenta orsamentu husi tetu inisiál ne’ebé iha.
Durante apresiasaun OJE, Deputadu sira koloka kestaun liuliu foku hasa’e produsaun produtu ho mós ninia kualidade atu iha sertifikasaun hodi kompete iha merkadu ASEAN, fó importánsia serbisu estensionista, promove sistema modernu iha prátika agrikultura, reforsu kontrola floresta prevene sunu ai iha foho lolon, tau atensaun irrigasaun ne’ebé abandona, mellora jestaun manutesaun tratór no disponibiliza tratór hodi fasilita agrikultór, kontrola peska ilegál.
Notísia relevante:https://tatoli.tl/2025/11/06/mappf-prioriza-setor-agrikultura-hodi-hasae-investimentu-ekonomia-rai-laran/
Jornalista: Nelson de Sousa
Editór: Evaristo Soares Martins
