DILI, 20 Novembru 2025 (TATOLI)— Treinadór Prinsipál Selesaun Nasionál Timor-Leste, Zé Pedro promete sei eleva prestasaun futeból Timor-Leste liuhosi hasa’e kualidade ekipa selesaun nasionál iha futuru.
Zé Pedro esplika bainhira atu atinje objetivu selesaun nasionál Timor-Leste ne’ebé forte presiza iha kompetisaun doméstika ne’ebé kompetetivu no kompleta fasilidade nune’e bainhira Timor-Leste partisipa jogu iha rejiaun bele manán nasaun seluk iha Ázia.
“Bainhira ida-ne’e mak implementa, fiar katak tinan sira mai oin ita sei iha prestasaun bainhira kompete ho nasaun seluk,” Treinadór Zé Pedro hateten liuhosi konferénsia imprensa iha edifísiu Federasaun Futeból Timor-Leste (FFTL), Bairros dos Grilos, Kinta ne’e.
Zé Pedro relata esforsu hotu ne’ebé halo durante asumi nu’udar treinadór seidauk atinje tuir espetativa públiku maibé nia parte kompromete ho apoia husi estrutura FFTL sei kontinua dezenvolve selesaun nasionál futeból Timor-Leste.
Notísia relevante: Zé Pedro aprezenta razaun rua Timor-Leste falla iha jogu kualifikasaun AFC Asian Cup
Esforsu ne’ebé atu implementa mak hanesan selesaun jogadór husi sub-23 hamutuk ho senior tenke mantein disiplina, kontrola jogadór sira no hatuur plataforma tuir filozofia ne’ebé sei trasa hamutuk ho estrutura FFTL.
Iha fatin hanesan, Diretór Serbisu Selesaun Nasionál FFTL, João Manico Amarál, hateten Zé Pedro la’ós de’it hanesan treinadór maibé atu dezenvolve mós kurríkulu no filozofia futeból ba selesaun nasionál, tan ne’e FFTL la fó meta atu hakat liu faze kualifikasaun AFC Asian Cup 2027.
“Zé Pedro nia prezensa atu hatuur baze futeból hodi ita hakat bá-oin nune’e iha futuru ita bele tau meta iha kompetisaun seluk tuirmai,” Manico deklara.
Manico salienta FFTL nafatin depozita konfiansa ba treinadór husi Portugál referidu no túr hamutuk evalua ona jogu tolu ne’ebé liubá inklui fururu sei hili fini jogadór idade 17 ba estájiu iha Portugál nune’e bele reforsa selesaun bainhira nasaun presiza.
Entretantu, FFTL selebra kontratu ho treinadór Zé Pedro iha loron-27 Agustu 2025 ho durasaun tinan-ida, ne’ebé tuir planu sei termina iha Agustu 2026 no posibilidade sei estende kuandu estrutura atuál kontinua eleitu iha kongresu iha inísiu tinan oin.
Jornalista: Natalino Belo
Editór: Xisto Freitas da Piedade
