DILI, 22 Novembru 2025 (TATOLI) – Telkomsel realiza Festivál “Telkomsel Conect” no lansa aplikasaun rua hanesan “Família Link” no “Icha” hodi halo melloria atendimentu ba populasaun sira.
Xefe Ezekutivu Ofisiál (CEO) Benedictus Ardiyanto Priyo agradese povu Timor-Leste tanba fó nafatin konfiansa ba operadora telekomunikasaun Indonézia ne’e.
“Ohin loron Telkomsel nu’udar operadór ne’ebé eziste ona iha Timor-Leste durante tinan-13 ona. Maske ho dezafiu oioin maibé Telkomsel nafatin hamriik hodi fó atendimentu ho di’ak, serví ho domin tuir moto (lema) Telkomsel nian. Obrigadu povu Timor-Leste,” CEO Benedictus hateten iha nia intervensaun konsertu múzika “Festival Telkomsel Conect”, iha Portu Dili, sábadu ohin.
Serví ho domin
Nia kompromete, ba oin Telkomsel sei hadi’a atendimentu di’ak liután ba nia kliente sira iha Timor-Leste.
“Ami rekoñese katak atendimentu sira ba ami-nia kliente seidauk másimu maibé ba oin ami sei hadi’a atendimentu sira ne’e ho di’ak liu, nune’e povu bele kontinua tau konfiansa ba Telkomsel. Dala ida tan ha’u dehan, Telkomsel sei serví ho domin”, nia afirma.
Iha biban ne’e, CEO Benedictus lansa mós aplikasaun rua hanesan “Família Link” no “Icha” hodi halais atendimentu ba komunidade.
Nia salienta, aplikasaun ne’e importante ba situasaun indústria dijitalizasaun mundu ohin loron nian.
Autoridade operadora telekomunikasaun ne’e kompromete, Telkomsel sei kontinua servisu ho Governu Timor-Leste hodi fó apoiu ba povu Timor-Leste liuhusi asisténsia telekomunikasaun.
Iha fatin hanesan, komunidade Agostinho Reis hateten, dezde ezisténsia Telkomsel nian iha 2012 to’o agora nia uza sim card Telkomsel nian atendimentu Telkomsel di’ak tebes durante ne’e.
“Ha’u uza sim card Telkomsel dezde Telkomsel hahú estabelese nia operadór iha Timor-Leste. Ha’u haree ein-termu atendimentu sira di’ak maibé husu tenke mellora liña internet”, nia solisita.
Entretantu Festivál “Telkomsel Conect” 2025 ne’ebé hala’o iha Portu Dili ne’e ho atividade la’o ain ne’ebé hahú iha sábadu loron (22/11) tuku 7:00 husi Timor Plaza to’o Portu Dili, dansa kulturál, fahe prémiu no taka ho konsertu múzika ne’ebé harame husi artista lokál no artista estranjeiru, eskluzivamente husi NTT (Nusa Tengara Timur).
Jornalista: Natalino Costa
Editór: Rafael Ximenes de A. Belo
