OEKUSI, 15 Dezembru 2025 (TATOLI) – Hahú husi fulan-Janeiru mai to’o Novembru 2025, Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), rekolla reseita ba kofre Estadu hamutuk rihun $62,005 mai husi infrasaun tránzitu no Postu Integradu Fronteira (PIF) Sakato ho Oésilo.
“Serbisu ne’ebé PNTL rekolla reseita ba kofre Estadu rihun $62,005. Orsamentu ne’e mai husi fonte tolu, husi sesaun tránzitu rihun $29.246, Postu Integradu Fronteira Sakato rihun $31.178 no Postu Integradu Fronteira Oésilo rihun $1.578, ita rejista mai to’o Novembru de’it,” Komandante PNTL RAEOA, Superentendente Asistente Polísia, Angelo Quelo, ba jornalista sira iha Oekusi, ohin.
Komandante PNTL ne’e, esplika, reseita hirak-ne’e, rekolla liuhusi Postu Integradu Fronteira (PIF) sira movimentu tama no sai tenke selu, ba infrasaun husi tránzitu nian, kabe ba sansaun ba sidadaun ne’ebé kondus motorizada la uza kapasete, laiha karta kondusaun, dokumentu laiha, inklui asidente tráfegu, tantu motorizada, karreta no tum-tum.
“Polísia Tránzitu no Seguransa Rodoviária, sei kontinua nafatin halo fiskalizasaun, kontrola movimentu transporte iha estrada públiku, hodi asegura utilizadór estrada sira, ne’ebé husu sidadaun hotu presiza kumpre regra ne’ebé hatuur ona iha lei,” nia apela.
Notísia relevante: https://tatoli.tl/2023/03/22/aprovasaun-kodigu-estrada-nian-atu-mellora-prevensaun-no-seguransa-rodoviaria/
Jornalista: Abílio Elo Nini
Editór: Rafael Ximenes de A. Belo
