DILI, 15 Dezembru 2025 (TATOLI)-Ministru Obra Públika, Samuel Marçal, hateten projetu reabilitasaun estrada husi Glenu bá Letefoho, iha munisípiu Ermera, nia prosesu iha ona Komisaun Nasionál Aprovizionamentu (CNA, sigla portugés), nune’e hein desizaun husi Banku Mundiál atu implementa.
Samuel Marçal rekoñese daudaun tempu udan no komunidade Ermera preokupa tebes ho estrada ligasaun Glenu-Letefoho, ne’ebé antes ne’e Governu aterru, maibé agora rai dodook no difikulta tebes movimentu transporte públiku.
Tuir nia, dalaruma akompaña husi mídia sosiál ema hotu dehan Ministériu Obra Públika (MOP) ko’alia barak no la tau importánsia, maibé atu dehan de’it katak MOP mak na’in ba projetu, maibé prosesu ne’e la’ós de’it iha MOP, enkuantu iha mós CNA ne’ebé tutela hela ba ministériu seluk.
“Ami nafatin kontaktu ho Banku Mundiál atu fó resposta lalais ba projetu ne’e hodi implementa, maibé ida-ne’e área ida tama ema-nia administrasaun, ita labele tama to’o ne’ebá”, Samuel Marçal hateten iha Ministériu Finansa, ohin.
Relasiona ho populasaun sira-nian preokupasaun kona-ba estrada Glenu-Letefoho, nia parte rasik bá halo observasaun direta iha terrenu no nota katak grave duni. “Komunidade preokupa, ha’u mós preokupa liu, tanba ida-ne’e ha’u-nia programa. Preokupa tebes ho situasaun estrada husi Glenu bá Letefoho tanba hodi bainhira ha’u halo vizita badak ida haree kondisaun grave duni”, nia admite.
Maski públiku kestiona maibé, Governante ne’e husu ba povu Ermera atu pasiénsia uitoan tanba buat hotu labele halo dala-ida iha loron ida de’it.
Iha biban ne’e, jornalista TATOLI tenta halo kontaktu ho Ministru Planeamentu no Investimentu Estratéjiku, Gastão de Sousa, kona-ba prosesu aprovizionamentu estrada Glenu bá Letefoho ne’ebé daudaun la’o iha Komisaun Nasionál Aprovizinamentu, maibé nia parte hataá seidauk bele fó komentáriu tanba okupadu ho serbisu.
Lembra katak, iha loron 16 Setembru 2025, Ministru Gastão Sousa hateten prosesu avaliasaun ba projetu reabilitasaun estrada iha Glenu bá Letefoho-Ermera finaliza ona iha faze aprovizionamentu, maibé sei hein resposta husi Banku Mundiál antes implementa.
“Prosesu aprovizionantu ba estrada Glenu no Letefoho ne’e hotu ona, agora ami haruka fali karta ida ba Banku Mundiál”, governante ne’e informa.
Nia esplika karta ne’ebé sira haruka ba Banku Mundial ne’e husu klarifikasaun antes halo konkordánsia hodi asina kontratu, maibé seidauk iha resposta husi Banku Mundiál.
Lembra katak verba ne’ebé prevee, iha tinan ne’e, ba Konsellu Administrasaun Fundu Infraestrutura hamutuk millaun $310,75 no ba Fundu Empréstimu hamutuk millaun $50,29, no ba projetu konstrusaun estrada husi Glenu bá Letefoho mai husi Fundu Empréstimu hamutuk millaun $40-resin.
Notísia relevante: Banku Mundiál hakarak reabilitasaun estrada Glenu-Letefoho tenke garante nia kualidade
Jornalista: Arminda Fonseca
Editora: Maria Auxiliadora
