DILI, 17 Dezembru 2025 (TATOLI)-Autoridade Portuária Timor-Leste, Institutu Públiku (APORTIL, I.P) rekolla reseita $1.669.924,19 husi Janeiru to’o 16 Dezembru 2025.
Vogál II APORTIL, Leandro de Sena, hateten reseita sira ne’ebé rekolla ne’e maihusi atividade hanesan operasaun ró-ahi Berlin Ramelau, Nakroma, Success, fatin estasionamentu no fó aluga armazein APORTIL nian ba EDTL no seluk tan.
“Reseita ne’ebé ita kobre ne’e hahú husi Janeiru to’o Dezembru semana dahuluk mak millaun $1,6. Fiar katak to’o Dezembru ramata ne’e ita bele kobre to’o millaun $1,7”, Leandro de Sena informa ba Tatoli iha Kolmera, ohin.
Nia esplika reseita sira ne’e maihusi atividade sira ne’ebé fó ba ró sira halo operasaun tuir oráriu, hanesan viajen Berlin Ramelau nian husi Dili bá Oekusi, husi tersa ho sesta, no husi Oekusi mai Dili, kuarta no sabadu, ho kustu billete bá-mai $8.
Oráriu Berlin Nakroma nian husi Dili bá Ataúru iha sabadu no domingu, bá-mai ho kustu $4. Ró-ahi Star CRAFT bá-mai Dili-Ataúru iha kinta no sabadu ho kustu $10 no ba VIP $12.
Ró Success entre Dili-Ataúru iha tersa no sesta ho kustu bá-mai $5 no Dili-Oekusi iha kuarta no domingu no Oekusi-Dili kinta no segunda ho presu $10.
Jornalista: Arminda Fonseca
Editora: Maria Auxiliadora
