DILI, 18 Dezembru 2025 (TATOLI)-Fórum Organizasaun Naun-Governamentál Timor-Leste (FONGTIL) konsidera asaun husi Sekretariu Estadu Asuntu Toponímia no Organizasaun Urbana (SEATOU) ne’ebé sobu tenda negosiante nian ne’ebé harii iha espasu públiku Palásiu Prezidensiál ne’e afeta ba Prezidente Repúblika, José Ramos-Horta, nia integridade nu’udar órgaun soberania ida.
“Intervensaun ne’e ba ami haree hanesan buat ida ameasa ba ita-nia integridade orgaun soberania ida. Tanba Prezidente Repúblika hanesan órgaun soberania ida, buat ne’ebé loloos bele halo mak la’ós halo intervensaun radikál, maibé bele halo koordenasaun sai di’ak liután”, Valentim da Costa Pinto hateten iha Tower, Fatuhada, ohin.
Nia esplika katak atividade feira natál ne’ebé Prezidénsia Repúblika halo la’ós foin, maibé kada tinan, nune’e loloos SEATOU koordena ho liña ministeriál no gabinte Prezidente Repúblika atu atividade ne’e la’o no movimentu ba espasu públiku mós kontinua iha no la’ós bá sobu.
“Planu hothotu iha intensaun di’ak, Prezidente Repúblika realiza feira ne’e hakarak promove alegria ba sidadaun hothotu mai husi atividade saida de’it atu konvida ema hothotu festeza Dezembru ida-ne’e ho di’ak. Loloos ne’e koordena malu, nune’e labele hamosu disputa sira hanesan ne’e, liuliu ba Prezidente Repúblika nia programa”, dehan.
Nia dehan SEATOU iha kompeténsia halo kontrolu ba atividade sira ne’ebé utiliza espasu públiku no ida ne’ebé Prezidénsia Repúblika halo ho planu provizóriu de’it.
“Ita bá halo asaltu hanesan ne’e, ema seluk hateten saida ba ita? Ida-ne’e ladi’ak, ita tenke asegura planu hotu la’o di’ak, tanba ida-ne’e la’ós permanente. Bá halo saturnu ida-ne’e hatudu ita-nia imajen ladi’ak ba funsionámentu órgaun soberania sira, ladi’ak ba órgaun nia integridade, tanba Prezidente Repúblika nu’udar símbolu ba unidade no símbolu ba asaun hothotu iha ita-nia rai”, afirma.
Lembra katak, horisehik akontese dezentendimentu entre SEATOU no Palásiu Prezidensiál no Autoridade Munisípiu Dili, tanba ekipa SEATOU sobu negosiante sira-nia tenda ne’ebé harii iha espasu públiku, maski nune’e la afeta ba atividade feira natál nian.
Tanba Xefe Estadu, José Ramos-Horta, orienta ekipa sosiedade sivíl no Prezidente Autoridade Munisipál Dili kontinua organiza atividade feira ne’e iha resintu Palásiu Prezidensiál Nicolau Lobato, Bairru Pité, Dili.
“Feira ne’e hala’o [tanba] hetan orientasaun husi ita-nia Prezidente Repúblika. Ida-ne’e atu selebra loron boot natál, tinan foun, no loron nasionál erói sira-nian”, pozisaun Xefe Estadu nian hato’o liuhusi Prezidente Autoridade Munisipál Dili, Francisco dos Santos, iha Palásiu Prezidensiál.
Notísia relevante: Dezentendimentu SEATOU ho Palásiu Prezidensiál la afeta ba atividade feira Natál
Jornalista: Arminda Fonseca
Editora: Maria Auxiliadora
