DILI, 19 Dezembru 2025 (TATOLI) – Banku Mundiál nia apoiu ba Governu Timor-Leste liuhusi fundu empréstimu ba reabilitasaun estrada husi Glenu bé Letefoho, munisípiu Ermera, promove aprovizionamentu bazeia ba dezenvolvimentu sustentavel.
Reprezentante Banku Mundiál iha Timor-Leste, David Freedman, esplika katak Banku Mundiál iha kompromisu atu fó apoiu ba Governu hodi hadi’a asesu ba estrada, seguransa, no reziliénsia ba klima liuhusi Timor-Leste Branch Road Project (TLBRP), ne’ebé inklui obra sira ne’ebé hala’o hela iha autoestrada Glenu bá Letefoho.
David Freedman esplika katak prosesu aprovizionamentu daudaun la’o hela tanba prosesu aprovizionamentu ba segmentu Glenu0Letefoho husi projetu ne’e implementa polítika sira ne’ebé inkorpora meta ba sustentabilidade ambientál, sosiál, no ekonómika.
“Bainhira polítika sira ne’e kumpre ona, Banku Mundiál sei fó apoiu ba nasaun kliente sira, inklui Governu Timor-Leste hodi hametin sira-nia kapasidade aprovizionamentu, asegura kustu efetividade, integridade, no alkansa sira-nia rezultadu dezenvolvimentu sustentavel nian”, David Freedman hateten iha entrevista ho Tatoli via online.
Antes ne’e, Ministru Obra Públika, Samuel Marçal, afirma katak projetu rehabilitasaun estrada husi Glenu bá Letefoho iha la’o hela Komisaun Nasionál Aprovizionamentu (CNA) no hein hela resposta husi Banku Mundiál mak foin bele implementa.
Samuel Marçal rekoñese daudaun tempu udan no komunidade Ermera preokupa tebes ho estrada ligasaun Glenu-Letefoho, ne’ebé antes ne’e Governu aterru, maibé agora rai dodook no difikulta tebes movimentu transporte públiku.
“Ami nafatin kontaktu ho Banku Mundiál atu fó resposta lalais ba projetu ne’e hodi implementa, maibé ida-ne’e área ida tama ema-nia administrasaun, ita labele tama to’o ne’ebá”, Samuel Marçal hateten iha Ministériu Finansa, foin lalais.
Lembra katak verba ne’ebé prevee, iha tinan ne’e, ba Konsellu Administrasaun Fundu Infraestrutura hamutuk millaun $310,75 no ba Fundu Empréstimu hamutuk millaun $50,29, no ba projetu konstrusaun estrada husi Glenu bá Letefoho mai husi Fundu Empréstimu hamutuk millaun $40-resin.
Notisía relevante: Reabilitasaun estrada Glenu-Letefoho hein resposta husi Banku Mundiál – MOP
Jornalista: Arminda Fonseca
Editora: Maria Auxiliadora
