DILI, 22 Dezembru 2025 (TATOLI) – Diresaun Nasionál Transporte Terreste (DNTT) halo ona akizisaun ba xapa matríkula orijinál ba karreta no motór hamutuk 69.009 ho orsamentu $704.615.
Nune’e, Xefe Departamentu Sekretariadu Apoiu Tékniku Administrasaun DNTT, Nelson Sequeira, husu ba kondutór no motorista sira ne’ebé uza xapa matríkula provizóriu hodi bele foti nia orijinál iha Janeiru 2026.
“Xapa matríkula ne’e rasik tama ona iha semana kotuk. Daudaun ne’e ita-nia lojístiku prepara hela, hahú Janeiru 2026 maluk sira ne’ebé daudaun uza hela xapa matríkula provizóriu bele mai foti orijinál”, Nelson Sequeira dehan ba Tatoli iha Balide Dili, ohin.
Nia informa katak xapa matríkula ne’ebé daudaun DNTT rejista ba karreta privadu husi kode B.20-000 TL to’o C.16.531TL ho totál hamutuk 9.025, xapa matríkula Governu nian 500, kamioneta hamutuk 2.500, xapa espesiál hamutuk 200 no transporte públiku hamutuk 1.000.
Aleinde ne’e, xapa matríkula ba karreta ne’ebé aat ka lakon ba halo foun fali hamutuk 300. “Ita mós iha xapa matríkula motoriza Z-0000 TL no xapa matríkula privadu hamutuk rihun 40, no xapa matríkula motór Governu nian hamutuk 2.790”, adianta.
Lembra katak, iha Juñu 2025, DNTT halo ona distribuisaun xapa matríkula ba karreta 19.500 no motór 54.468, ne’ebé halo akizisaun ho totál orsamentu hamutuk $764.680.
Notísia relevante: DNTT husu públiku troka livrete provizóriu ba orijinál
Jornalista: Arminda Fonseca
Editora: Maria Auxiliadora
