DILI, 23 Dezembru 2025 (TATOLI) – Polísia Nasionál Timor-Leste (PNTL) munisipiu Bobonaru ofisializa, iha tersa ne’e, implementasaun ba planu operasaun “Alerta Um” hodi asegura selebrasaun Natál no Tinan Foun 2026 ho situasaun seguransa no orden públika ne’ebé konduzivu.
Segundu Komandante PNTL munisípiu Bobonaro, Inspetór Asistente José Casemiro de Carvalho, afirma katak preparasaun hotu-hotu halo ona, inklui orientasaun ba komandante eskuadra sira no destakamentu pesoál iha postu seguransa no iha sentru sidade.
“Ami iha PNTL Komandu munisípiu Bobonaru prontu ona depois retiru ne’e. Ami implementa kedas orden alerta um. Ohin dadeer, ami orienta membru sira iha eskuadra sira no iha munisípiu laran tomak hodi garante Natál no Tinan Foun ne’ebé pás no hakmatek”.
Superintedente Asistente ne’e subliña katak PNTL sei utiliza rekursu hotu-hotu ne’ebé iha hodi prevene no prosesa kualkér aktu kriminál ne’ebé potensialmente bele perturba selebrasaun ne’e.
Komandante ne’e husu ba komunidade hotu, liuliu inan-aman joven, no sarani sira iha Bobonaru atu serbisu hamutuk hodi mantein seguransa no orden públika durante selebrasaun Natál no Tinan Foun. “Ami prontu ona garante seguransa, maibé sein apoia husi inan-aman no joven sira, PNTL mós labele mesak. Ne’ebé husu ita hotu nia apoia oinsá atu lori pás no hakmatek hodi selebra Natál no Tinan Foun”, dehan.
Nia hatutan katak PNTL observa seidauk iha área risku sira ne’ebé potensialmente hamosu perturbasaun seguransa nian. “Ho kooperasaun di’ak, molok Natál no Tinan Foun, ami la haree lokalizasaun espesífiku ruma ne’ebé iha potensiál hamosu problema sira”, nia hakotu.
Notísia relevante: Populasaun iha postu Bobonaru tenke kria ambiente hakmatek durante natál no tinan foun
Jornalista: Sergio da Cruz
Editora: Maria Auxiliadora
