DILI, 24 Dezembru 2025 (TATOLI) – Ministériu Komérsiu no Indústria (MKI) observa katak presu nesesidade bázika iha merkadu no supermekadu sira matein normál.
Ministru Komérsiu no Indústria, Filipus Nino Perreira, relata katak semana hirak liubá halo ona observasaun bá loja no merkadu sira katak presu ba folin sasán mantein, liuliu nesesidade bázika sira.
“Tanba ita hatene katak bainhira tama ona tempu natál no tinan foun sempre iha manipulasaun ba presu. Maibé, hafoin ami halo observasaun, ko’alia ho ita-nia vendedór sira, presu sei mantein liuliu foos, mina, manu-tolun, trigu, sedaap, no seluk tan”, governante ne’e dehan.
Nia haktuir katak iha monitorizasaun ne’e sira mós nota stock sasán iha armazein sira mós sufisiente hodi garante to’o tinan oin. Monitorizasaun ne’e hala’o loroloron hahú husi nasionál to’o munisípiu hotu hodi garante katak presu sei laiha manipulasaun.
“Ita husu sira mantein folin atu fasilita ita-nia kompradór sira bele asesu ba sasán ho presu ne’ebé razoavel”, nia dehan.
Tuir observasaun MKI, folin foos normál tuir ninia kilógrama (kg) mak ba marka Globus 30kg presu $15,50, foos Kuda Ulun 30kg $18,50, Foos Lafaek 30 kg $18.
Foos Foho Ramelau 25kg $13,50, Gostu loos 25kg $13,25, Tali Mera $13,50, Haksolok 20 kg $10, Gostu Loos 20kg $11,50 no seluk tan.
Ba mina Bimoli litru 5 ho presu $6,90, Sania litru 5 ($7,25) Bintang litru 4,5 ($6,50), Enak litru 4,5 ($6), Bimoli litru 2 ($3), Amor litru 2 ($2), Bimoli litru 1 ($1,60) no seluk tan.
Masin-midar saka ida 50kg ($34), falun ida 5kg ($4,50), trigu Beruan Biru 25kg ($16,75) Falcom 25kg ($16), Beruan Biru 1kg ($0,75) no seluk tan.
Manu-tolu nlokál rak ida $4,75, manu-tolu importasaun rak ida $4,50, Sedaap Goreng falun ida $0,20, ayam potong 800gr $2,50, no 1.300 gr $3,75 no seluk tan.
Jornalista: Arminda Fonseca
Editora: Maria Auxiliadora
