DILI, 08 Janeiru 2026 (TATOLI)—Liuhusi Kongresu Dewan Solidaritas Mahasiswa Pemuda Pelajar Timur Timur (DSMPPTL) iha inísiu Dezembru 2025, kongresista sira eleje atuál Komandante Komandu Pesoa no Formasaun, Superintendente Xefe Polísia Arquimino Ramos sai Sekretáriu Jerál ba períodu 2025-2030.
“Eleisaun ida-ne’e hanesan konfiansa husi kongresista sira hanesan membru ita tenke kumpre, tuir estatutu ne’e Asembleia ne’e mak a’as liu ona, ne’ebé iha kongresu deside ida ne’e, ida-ne’e atu ita tenke kumpre,” Arquimino Ramos hateten ba Jornalista sira iha ninia knaaar fatin, Kaikoli, Kinta ne’e.
Nia esplika, iha prosesu eleisaun ba estrutura foun, Prezidente no Sekretáriu Jerál DSMPPTL ne’e iha pakote rua ba eleisaun, pakote A no B no iha eleisaun ne’e iha pakote B mak hetan votu barak liu.
“Prezidente mak kompañeiru João Sarmento, ha’u rasik Sekretáriu Jerál, iha Vise-Prezidente na’in-ida, pois iha tezoreiru, Prezidente Konsellu fiskál ho membru na’in-rua tan, hamutuk na’in-neen iha estrutura períodu 2025-2030,” nia akresenta.
Arquimino hateten ida-ne’e nu’udar responsável ne’ebé todan atubele kontinua luta.
“Uluk ita kontribui ba ukun rasik-an. Tanba ne’e, atu kontinua ida-ne’e oinsá bele fó valoriza ba membru Dewan Solidaritas Mahasiswa Pemuda Pelajar Timur Timur ne’ebé uluk luta ba libertasaun nasionál. Daudaun ita halibur malu hodi tulun kolega sira ne’ebé uluk serbisu ba Dewan Solidaritas, balun seidauk hetan rekoñesimentu ka balun seidauk hetan sertifikadu rekoñesimentu ruma. Tanba ne’e mak daudaun ita alista membru sira hotu,” nia katak.
Notísia relevante : Governu atribui sertifikadu rekoñesimentu ba DSMPPTT na’in-74 iha Covalima
Prioridade ba mandatu ne’e maka atu halo rejistu ba membru dewan sira husi nasionál to’o munisípiu ne’ebé uluk fó sira-nia kontribuisaun ba luta libertasaun nasionál inklui estudante universitáriu to’o sekundária sira no joventude sira ne’ebé uluk envolve hamutuk iha dewan hodi hala’o asaun pásifika nomós fó apoiu kampaña door to door ba Konsulta Populár iha 1999 hodi luta ba ukun rasik-an.
“Ita buka oinsá mak alista sira hotu, sira-nia família ne’ebé mate durante asaun ne’ebé dewan solidaritas organiza,” nia hato’o.
DSMPPTL nia prioridade iha tempu ukun rasik-an tuir estrutura ida-ne’e mak dahuluk atu ajuda ekonomia família husi membru Dewan Solidaritas Mahasiswa Pemuda Pelajar Timur Timur, depois ajuda edukasaun sívika.
“Ohin ami enkontru ona ho Sua Eselénsia Señor Ministru Asuntu Kombate Libertasaun Nasionál, iha enkontru ne’e Ministru hodi husu ba Dewan atu fó edukasaun sívika ba ita-nia veteranus sira atu kompreende lala’ok rejistu veteranu nian tuir lei veternu nian, ida-ne’e mak ita bele halo ita labele minimiza tiha falsifikasaun dokumentu rejistu ba vetenu,” nia hato’o.
DSMPPTL nia planu ba oin mak atu komunika ba malu hodi ajuda halo formasaun jestaun no lideransa ba membru sira.
Aleinde ne’e, programa ba oin mak ajuda Governu hodi halo reziliénsia klimátika ne’ebé akontese iha mundu.
“Rai manas iha mundu ida-ne’e Dewan sente katak ita mós tenke hola parte iha luta ida-ne’e para oinsá mudansa klimátika ne’e labele afeta maka’as liu ba Timor-Leste karik programa sira ne’e mak estrutura foun sei halo ba oin no kontnua nafatin valoriza ita-nia membru sira,” Sekretáriu Jerál hatutan.
Jornalista : Natalino Costa
Editora : Julia Chatarina
