BOBONARU, 29 Dezembru 2026 (TATOLI) – Programa Nasionál Dezenvolvimentu Suku (PNDS) Bobonaru siklu daualuk tinan 2026 tau prioridade ba konstrusaun estrada rurál distánsia kilómetru rua iha suku Sibuni, postu administrativu Bobonaru, munisípiu Bobonaru, ne’ebé liga sentru suku bá aldeia Homesel.
Xefe suku Sibuni, Angelo de Jesus, dehan komunidade prioriza estrada liga bá aldeia Holmesel, tanba tempu udan difikulta tebes movimentu ema husi aldeia bá sentru suku, postu administrativu no kapitál munisípiu.
Notísia relevante: Komunidade husu MOP prioritiza estrada-ponte iha Molop no Sibuni
“Ita hili prioridade halo estrada bá Holmesel para bele fasilita sira-nia movimentu iha tempu udan”, nia informa ba Tatoli, ohin.
Líder komunitáriu ne’e subliña katak, posiblidade tinan oin sei kontinua halo estrada bá aldeia Holmesel, tanba aldeia Sibuni kuaze estrada di’ak ona no Mape-Op mós tinan ne’e hetan projetu reablitasaun estrada rurál husi Ministériu Obra Públika.
Estrada liga bá aldeia Homesel ne’e sei benifisia komunidade uma-kain 67. “Komunidade sira sei serbisu maka’as tanba sira mak hakarak sente dezenvolvimentu”, dehan.
Sibuni, suku ida ne’ebé lokaliza iha munisípiu Bobonaru, kobre área ida ho maizumenus kilómetru kuadradu 13.21 no iha populasaun 918 tuir dadus tinan 2022 no suku ne’e iha aldeia tolu mak hanesan Mape-Op, Holmesel no Sibuni.
Notísia relevante: Ambulánsia labele tula pasiente iha Sibuni-Bobonaro tanba estrada a’at
Jornalista: Sergio da Cruz
Editora:Maria Auxiliadora
