DILI, 29 Janeiru 2026 (TATOLI)—Diretór Servisu Apoiu Diagnóstiku Terapéutiku iha Ospitál Nasionál Guido Valadares (HNGV-sigla portugeza), Vidal de Jesus Lopes, rekoñese katak iha duni overload, tan ne’e daudaun ne’e hahú transferida pasiente na’in-haat ba Ospitál António Carvalho Lahane hodi kontinua halo tratamentu.
“Númeru transferénsia pasiente aumenta, iha-ne’ebé provoka duni situasaun overload ne’e,” Diretór dehan ba jornalista sira iha nia kna’ar fatin, HNGV, Kinta ne’e.
Vídeo ne’ebé mak daudaun ne’e virál iha mídia sosiál kona-ba insufisiénsia fasilidade, nia esplika, iha emerjénsia iha kama 62 ba adultu ho labarik, maibé pasiente mai liu tiha kama ne’ebé mak prepara.
“Pur-ezemplu, durante oras ida mak pasiente tama 70, provoka overload iha-ne’ebá. Kuandu to’o iha emerjénsia profisionál saúde sira tenke haree no halo avaliasaun no mós deside estabiliza maka depoiz fó baixa ba kada sala,” Vidal haktuir.
Notísia relevante: MS rejista kazu dengue 1.002 iha Janeiru no intensifika medida prevensaun
Nia informa, daudaun ne’e, Ospitál Nasionál Guido Valadares hahú prepara fatin alternativu ida mak karantina Tasi-Tolu hodi responde ba surtu ne’ebé mak akontese, maibé alternativu ida ikusliu mak pediatria andár lima ne’e besik atu ramata ona iha tempu badak.
Vidal hatutan opsaun ida seluk tan mak fasilidade saúde sira seluk, prepara rekursu umanu ho fasilidade atubele redús transferénsia mai iha HNGV.
“Medida ikusliu mak alerta ba populasaun tomak katak dengue ne’e tenke halo prevensaun para labarik sira-ne’e labele moras no evita mai iha ospitál. Tanba agora tempu udan ne’e hamoos bee-lihun, hakoi lata aat no roda sira, hamoos uma-laran, hamoos tanke bee,” nia fó-hanoin.
Entretantu, Madalena Moniz nu’udár família pasiente hateten, sira hetan transferénsia husi Sentru Saúde Kampung Baru Komoro iha horisehik, maibé pasiente na’in-haat mak sa’e hamutuk ambulánsia ida.
“Iha Sentru Saúde Kampu Baru pasiente barak loos, entaun doutór sira transfere ami mai iha ne’e. Baibain ambulánsia ida tula ema ida, maibé iha-ne’ebá ambulánsia ida tula pasiente na’in-haat tula dala ida,” nia haktuir.
Nia dehan mai to’o iha HNGV ema barak, fatin atu toba mós laiha, túr de’it iha kadeira tanba pasiente barak.
Nune’e mós, família pasiente, Dorteia Sarmento hato’o agradese ba doutór sira-ne’ebé mak halo atendimentu ho di’ak tebes más fatin ne’e mak la sufisiente, pasiente na’in-rua toba hamutuk iha kama ida de’it.
Jornalista: Osória Marques
Editór: Xisto Freitas da Piedade
