KOVALIMA, 02 Fevereiru 2026 (TATOLI)– Autoridade Munisípiu Kovalima liuhusi Servisu Munisipál Asaun Sosiál (SMA), iha Orsamentu Jerál Estadu 2026, prevee orsamentu $38.000, hodi sosa karreta karru feneráriu ida atu transporta mate-isin husi postu administrativu sira ne’ebé pertense ba munisípiu Kovalima.
“Iha Orsamentu Jerál Estadu 2026, ami sosa karreta karru funeráriu ida ho nia orsamentu mak $38.000. Ami fó ona pedidu ba Prezidente Autoridade nune’e hein de’it despaixu atu empreza ne’ebé mak manán konkursu públiku bele halo akizasaun,” Diretor Servisu Munisipál Asuntu Sosiál, Clementino Bere,informa ba TATOLI,I.P, iha Bairru Kosta-Suai, ohin.
Daudaun ne’e, nia esplika iha karreta funeráriu tolu mak durante ne’e halo atendimentu, maibé ida kondisaun aat ona no tama iha lista leilaun. Nune’e bainhira sosa tan ida hamutuk haat ona, hodi transporta mate-isin ba postu administrativu sira.
Governu sentrál aloka OJE 2026 mai iha Kovalima hamutuk $9,517.979 husi orsamentu ne’e aloka ba Servisu Munisipál Asaun Sosiál hamutuk rihun $151,828 hodi sosa karreta, sosa kaixaun no atividade sira seluk hanesan fortalese ekonómia, viajen lokál no saláriu no vensimentu.
Notisia relevante:MSSI fasilita karru funerária ba família vítima transporta mate-isin ba munisípiu
Jornalista: Celestina Teles
Editór: Florencio Miranda Ximenes
