DILI, 15 janeiru 2024 (TATOLI)—Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten MSSI kontinua fasilita karru funeráriu ba família vítima hodi transporta mate-isin ba munisípiu maibé to’o de’it tuku 17h30 lorokraik.
Notísia Relevante: Munisípiu Viqueque simu karru funeráriu foun ida
“Kona-ba karreta funerária ami MSSI nian prontu apoiu transporta mate isin ba munisípiu sira kuandu karreta funerária lá to’o maibé ami apoiu to’o oras 17h30, kuandu liu ida-ne’e mak labele apoiu no sei atende fali iha loron tuir mai. Tanba ne’e regra mak nune’e duni,” Diretór Jerál MSSI ne’e hateten ba Agência Tatoli iha nia kna’ar fatin, Caicoli, segunda ne’e.
Ttuir nia, dala ruma ho atendimentu ida-ne’e mak dala ruma família matebian sira preokupa maibé ne’e mak regra ne’ebé estabelese.
Karreta funerária ba MSSI ne’e iha 13 inklui ho karreta funeráriu Verry Important Person (VIP) no kada munisípiu iha karreta funerária iha ida ka rua.
Iha munisípiu, karreta funerária iha hotu inklui ho kaixaun sira maibé kuandu karreta la to’o sira koordena ho MSSI hodi fasilita transporta mate-isin ba nia hela fatin.
Daudaun ne’e, Ministériu Solidariedade Sosial no Inkluzaun iha karreta funeráriu 40 resin, ne’ebé iha Dili karreta funeráriu 13 ba atendimentu públiku no ida ba ema Verry Important Person (VIP) no kada munisipiu inklui Rejiaun Administrativu Espesiál Oé-Cusse Ambeno (RAEOA) iha karreta rua ne’ebé mak Governu sosa ona iha 2009 no 2013.
Karreta funerária 13 sufisiente
Tuir nia, karreta funerária MSSI nian hamutuk 13 inklui ona ho karreta VIP nian ida-ne’e, sufisiente atu transporta mate-isin ba munisípiu.
“Ami-nia karreta funerária ne’e sufisiente no tuir informasaun dehan menus ne’e lá loos no ami lahetan informasaun kona-ba ida-ne’e. Ita-nia karreta funerária ne’e iha 12 no VIP ida, ne’ebé hamutuk 13. Ida-ne’e sufiente ona hodi fasilita transporta mate-isin ba munisípiu no iha nasionál. No Munisípiu Dili nian rasik mós iha rua,” nia dehan.
Tuir informasaun ne’ebé hetan ligadu ho mate-isin kada loron nian, nia dehan, karreta funerária ne’e transporta mate-isin lima ba leten, maibé atu dehan de’it katak karreta funerária ho motorista sufisiente no standby iha fatin.
Improtante mak koordenasaun no komunikasaun no importante liu ida mak regra tula mate-isin mak hahú hosi oras 08h30 to’o 17h30, no liu oras hirak ne’e labele no sei adianta fali ba aban dadeer.
Apoiu karreta funerária hosi MSSI nian ne’e dala barak, apoiu hosi nasionál ba munisípiu no karreta funerária rua Dili nian ne’e apoiu Dili laran de’it maibé kuandu labele transporta lalais mak MSSI nian sei fasilita tula ba nia uma.
MSSI la simu informasaun hateten mate-isin iha mortuáriu liu 15, ne’e lá loos, tanba kuandu MSSI simu mak MSSI rasik sei husu ajuda karreta funerária munisipál ne’ebé besik hanesan Aileu, Liquiça, Manatuto hodi bele apoiu no transporta mate-isin ba munisípiu ka ba nasionál.
MSSI ho mortuáriu Ospitál Nasionál Guido Valadares (HNGV, sigla Portugés) servisu di’ak no kuandu mate iha, sira dala ruma automatikamente telefone mai MSSI, maibé família matebian tenke trata uluk lai prosesu administrativu iha dirasaun karreta funerária nian iha Bemori.
Husu kona-ba motorista karreta funerária menus, nia hatán, ne’e la’ós tanba MSSI nia karreta funerária 13 inklui ho VIP nian ne’e ho nia motorista ketak-ketak no responsabilidade ba karreta ida-idak.
Jornalista : Osória Marques
Editór : Cancio Ximenes
