DILI, 04 Fevereiru 2026 (TATOLI) – Diretór-Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício, informa katak FDCH planeia, iha tinan ne’e, fó bolsa estudu pur méritu ba timoroan hamutuk 355.
“Vaga kona-ba bolsa pur meritu ne’ebe ita loke ba tinan ne’e maizumenus totál hamutuk ema na’in-355, ne’ebé foku ba área hanesan saúde, enjeñaria, téknika informátika, turizmu, edukasaun, agrikultura, istória, nomós direitu ba reforsa justisa nian”, Júlio Aparício adianta ba Tatoli ohin.
Husi totál bolsa estudu ne’e – 143 jere diretamente husi FDCH ne’ebé sei hahú halo rekrutamentu to’o pagamentu, no restu 212 ne’e instituisaun Estadu sira mak halo rekrutamentu no FDCH apoiu fundu de’it.
“Ezemplu, área direitu nian FDCH aloka orsamentu ba Gabinte Primeiru-Ministru Reforma Justisa nian mak jere”, katak.
Husi numeru bolseiru 355 ne’e, doutoramentu 21, mestradu 174, lisensiatura 160, ne’ebé sei haruka bá nasaun sira hanesan Brazíl, Portugál, Indonézia no Malázia. “Molok ita haruka bolseiru sira bá eskola, haree uluk kurríkulu sira husi universidade sira, tanba ema nian ne’e iha kurríkulu siénsia akademia no siénsia aplikada”, salienta.
Nia esplika iha siénsia akademia ne’e prepara ema atu bá hanorin tantu iha ensinu sekundáriu, enisnu baziku komu ensinu superiór, no siénsia aplikada ne’e forma ema atu fila mai uza nia matenek ne’ebé iha hodi kria postu traballu.
Tanba ne’e, durante mandatu FDCH sempre koordena ho liña ministeriál sira atu responde ba orientasaun Primeiru-Ministru, Xanana Gusmão, katak foku ba tékniku vokasionál, entaun sempre koordena sira prepara ema no haruka para mai fali serbisu iha área ne’ebé sira aprende.
Dezde 2024, FDCH halo rekrutamentu ba bolseiru sira, liuliu ba área espesialidade sira. Tuir planu, bolsa estudu ne’e sei loke iha Marsu tinan ne’e, tanba daudaun halo hela preparasaun sira ein termu júri. Totál orsamentu ba bolsa estudu ne’e hamutuk millaun $18-resin.
Notísia relevante: FDCH kontinua prioriza programa bolsu estudu iha 2026
Jornalista: Arminda Fonseca
Editora: Maria Auxiliadora
