DILI, 04 Fevereiru 2026 (TATOLI)-Ministru Komérsiu no Indústria, Filipus Nino Pereira, klarifika katak ministériu seidauk halo rekrutamentu foun ka renova kontratu funsionáriu kazuál sira ne’ebé termina ona serbisu iha tinan kotuk.
“Ita seidauk halo rekrutamentu foun. Kontratu sira ne’ebé mate iha tinan kotuk seidauk kontrata foun”, Nino Pereira dehan ba Tatoli, ohin.
Governante ne’e rejeita informasaun ne’ebé sirkula katak daudaun ne’e funsionáriu kontratadu hamutuk 200 hala’o fali ona serbisu iha ministériu.
Hafoin tama tinan foun 2026, Ministériu Komérsiu no Indústria (MKI) seidauk halo kontratu ba funsionáriu kazuál hamutuk 403, ne’ebé nia serbisu ramata iha 31 Dezembru 2025.
Nino Pereira esplika katak sira ne’ebé kontratu termina, signifika laiha ona relasaun ho ministériu, maibé bainhira Dekretu-Lei kona-ba Rejime Jurídiku ba Kontratu Traballu ho Termu Sertu iha Administrasaun Públika vigór ona maka bainhira presiza atu aumenta forsa traballu iha ministériu maka foin halo rekrutamentu foun ba sira.
Relasiona ho problema saláriu desimu terseiru nian, ministru afirma katak iha Janeiru ne’e rezolve hotu ona, tanba funsionáriu kontratadu no permanente simu ona sira-nia direitu.
Notísia relevante: MKI garante pagamentu saláriu désimu terseiru ba funsionáriu sira iha Janeiru ne’e
Jornalista: Arminda Fonseca
Editora: Maria Auxiliadora
