DILI, 10 Fevereiru 2026 (TATOLI)–Asian Football Confederation (AFC) no Asian Football Federation (AFF) dezeju susesu no hato’o kongratulasaun ba Nilton Telmo Gusmão dos Santos ne’ebé re-eleitu lidera Federasaun Futeból Timor-Leste (FFTL) ba períodu 2026-2030.
Prezidente AFC, Salman Bin Ibrahim Al Khalifa, sente haksolok hafoin simu novidade kona-ba Nilton Gusmão nia vitória nu’udár Prezidente FFTL liuhusi kongresu da-XIII iha Palm Springs Hotel, Domingu (08/02/2026).
Salman Khalifa relata, ho rezultadu eleisaun ho votu unánime ba mandatu 2026-2030 hatudu konfiansa husi família futeból Timor-Leste ba Nilton Gusmão relasiona ho vizaun atu dezenvolve di’ak liután futeból iha Timor-Leste.
“Favór simu ha’u-nia parabéns ho laran tomak no iha serteja ba ha’u no Konfederasaun Futeból Aziátiku nia apoiu tomak ba ita-boot nia inisiativa sira,” nota imprensa ne’ebé TATOLI asesu hateten iha Tersa ne’e.
Notísia relevante: Nilton Gusmão re-eleitu ba Prezidente FFTL períodu 2026-2030
Salman ho esperansa katak futeból iha Timor-Leste sei hahú iha faze foun ba progresu no kreximentu liuhusi lideransa no orientasaun husi Prezidente FFTL atuál.
Nune’e mós, Prezidente AFF, Majór Jenerál Khiev Sameth hato’o parabéns ba Prezidente Eleitu FFTL ba mandatu 2026-2030 iha-ne’ebé reflete konfiansa no dedikasaun ne’ebé metin ba avansu futeból iha Timor-Leste.
“Ha’u fiar katak ho ita-boot nia orientasaun, desportu sei kontinua buras iha forsa no espíritu, hodi haburas eselénsia iha kampu laran no iha kampu li’ur no inspira juventude ba futuru iha nasaun,” Majór Jenerál Kiev Sameth tenik.
Lider futeból iha Ázia ne’e kompromete atu kontinua halo kooperasaun serbisu ho FFTL liuliu iha parte interesada relevante sira hodi avansa liután dezenvolvementu futeból iha Timor-Leste.
AFF apresia ba sinseru no ospitalidade durante prezensa iha Timor-Leste durante delegasaun vizita iha Dili hodi partisipa kongresu FFTL ba da-XIII no realiza enkontru kortezia hoPrezidente Repúblika, José Ramos-Horta iha-ne’ebé hetan enkorajamentu husi diskusaun pozitiva no konstrutiva hodi apoiu dezenvolvimentu kontinuasaun futeból iha Timor-Leste.
“Favór simu ha’u-nia dezeju di’akliu ba ita-boot no ita-boot nia komité ezekutivu ne’ebé foin eleitu ba susesu hotu-hotu iha kapítulu foun emosionante ida-ne’e ba FFTL,” Jenerál Kiev Sameth hakotu.
Entretantu, kongresu FFTL ba da-XIII rezulta Nilton Gusmão nu’udár prezidente Ezekutivu FFTL, Tenente Jenerál Raul Falur Rate Laek ba vise prezidente, hamutuk ho membru komité ezekutivu hanesan José Luís de Oliveira, Komisáriu Polísia Henrique da Costa, Domingos dos Santos Caeiro, Engrasia Fernandes no Faustinho Godinho dos Santos.
Jornalista: Natalino Belo
Editór: Xisto Freitas da Piedade
