BOBONARU, 27 Fevereiru 2026 (TATOLI)-Ekipa husi Institutu Jestaun Ekipamentu no Apoiu Dezenvolvimentu Infraestrutura (IGEADI) normaliza ona estrada ligasaun husi kapitál Maliana bá postu administrativu Bobonaru no Loloto’e ne’ebé ameasadu atu kotu iha área Hali-Mesak, suku Odomau.
Intervensaun emerjénsia husi IGEADI ne’e hodi fasilita movimentasaun transporte públiku no privada ba interese komunidade nia atividade ekonómika no seluk tan.
Notísia relevante: Estrada ligasaun Maliana-Bobonaru kuaze kotu iha Hali-Mesak
“Horisehik IGEADI mai normaliza tiha ona. Karreta no motór bele liu bá-mai ho di’ak. Orsida sira mai hadi’a tan kraik ne’e para rai bele metin liután”, komunidade Bobonaru, Sebastião Alves, dehan.
Motorista José Lopes rekomenda ba Ministériu Obra Públika atu aselera prosesu konkursu públiku ba estrada referida. “Estrada sa’e mai ne’e tinan-tinan IGEADI normaliza beibeik, más udan aat fali. IGEADI nia serbisu mak ne’e duni, más ne’e gasta osan de’it tanba uza la kle’ur. Se bele halo di’ak kedas para uza mós ba tempu naruk”, nia fó hanoin.
Nia dehan bainhira estrada ne’e tama ba prosesu konkursu públiku, Governu presiza buka empreza ida ne’ebé iha esperiénsia ba konstrusaun estrada.
“Ne’e para estrada ne’e kualidade no ita uza mós bele to’o tinan 30. Tanba ita-nia kompañia lokál balun tinan barak ona hadi’ak estrada ho ponte husi Buipira sa’e bá to’o Bobonaru, más realidade ita haree aat nafatin. Ponte ida halo ne’e mos to’o agora la uza. Ne’e mak afeta estrada ida-ne’e atu kotu”, nia dehan.
Tuir observasaun jornalista Tatoli, movimentasaun transporte públiku no privada la’o normál hikas.
Notísia relevante: Komunidade husu ba MOP suspensaun projetu manutensaun estrada Maliana-Bobonaru
Jornalista: Sergio da Cruz
Editora: Maria Auxiliadora
