DILI, 05 Marsu 2026 (TATOLI)—Diretór Ezekutivu Agência Dezenvolvimentu Nasionál (SDN), Januário Guterres, informa iha inísiu fulan-Janeiru to’o Marsu ne’e halo ona identifikasaun ba kondisau infraestrutura edukasaun no saúde iha territóriu ne’ebé presiza atu reabilita no konstrui.
Nia hatutan, bazeia ba instrusaun husi Primeiru-Ministru, Kay Rala Xanana Gusmão, ba Ministériu Planeamentu Investimentu no Estratéjiku atu liuhusi Agência Dezenvolvimentu Nasionál (AND) atu koordena hamutuk ho Ministériu Edukasaun no Ministériu Saúde hodi identifika kondisaun infraestrutura edukasaun no saúde iha munisípiu.
“Verifikasaun ne’e foka liu ba eskola, sentru saúde, postu saúde no rezidénsia ba médiku sira-ne’ebé laiha tenke kontrui, ne’ebé kondisaun ladi’ak bele rebaikita fali. Tanba ne’e mak hahú iha fulan-Fevereiru ami hamutuk ho ME no MS la’o ona ba munisípiu hitu hanesan Aileu, Ainaru, Manufahi, Kovalima, Likisá, Ermera no Bobonaru,” Diretór ezekutivu ne’e relata ba Agência Tatoli iha nia kna’ar fatin, ohin.
Dirijente ne’e informa, dadus sira-ne’e ekipa téknika identifika hotu ona maibé seidauk serteza tanba foin identifika ba munisípiu tolu mak iha Aileu kuazé eskola hitu (7) mak presiza hadi’a no postu saúde tolu (3), iha Kovalima identifika seidauk hotu maibé provizóriu identifika ona eskola haat (4) no iha Ainaru iha eskola lima (5).
“Bainhira dadus sira-ne’e kompletu ona sira sei submete ba ADN iha fulan-Marsu antes haruka fali ba MPIE hodi foti desizaun liuhusi reuniaun konsellu administrasaun KAFI hadi’ak kondisaun infraetrutura saúde no edukasaun. Tanba foin dadauk nia ba halo observasaun deteta,e loos duni katak iha kondisaun infraetrutura balun ne’ebé urjentemente Governu presiza hadi’a,” nia haktuir.
Tauir nia, fasilidade sira-ne’e hotu balun konstrui iha tinan 2011 liuhusi programa PDIM, entaun tinan barak ona nomós rezidénsia ba médiku sira tenke hadi’a atu bele fó seguransa no vontade di’ak ba sira hodi halo atendimentu ba pasiente sira ho di’ak. Tanba ne’e, aleinde hadi’a postu saúde, sira mós hadi’a fatin rezidénsia nian ba médiku sira.
“Entretantu, iha 2025, ami konstrui ona postu saúde hamutuk 12 no tinan ida-ne’e iha postu saúde neen (6) mak prosesu kontrusaun la’o hela (on going). Agora, sira kontinua identifika fatin tanba tinan ida-ne’e orsamentu prevee ba fundu infraestrutura hodi responde ba infraestrutura edukasaun no saúde,” nia hateten.
Jornalista : Alexandra da Costa
Editór : Cancio Ximenes
