DILI, 09 Marsu 2026 (TATOLI)—Xefe Departamentu Imunizasaun husi Ministériu Saúde, Maria Angelina Pereira, informa iha tinan 2025 liubá labarik feto iha Timor-Leste hamutuk 6.252 (42%) mak simu ona vasina kontra Human Papiloma Virus (HPV).
“Iha tinan 2024, ita-nia kobertura ba vasina kontra serviks ba labarik idade 11 to’o 14 ne’e, ita atinje 100% maibé ba tinan 2025 ita atinje 42% tanba labarik barak mak simu ona vasina ne’e iha 2024 ne’e mak barak no 2025 nia atinjimentu menus,” Maria Angelina Pereira hateten ba jornalista sira iha nia kna’ar fatin, Kaikoli, ohin.
Nia hateten, tuir dadus husi kobertura imunizasaun HPV 2025 hahú husi Janeiru to’o Dezembru ne’e, labarik hamutuk 6.252 ne’e mak simu ona vasina kontra HPV no husi númeru ne’e iha Munisipiu Aileu labarik feto hamutuk 316 (48%), Ainaru iha labarik feto 277 (27%), Ataúru iha labarik feto 86 (74%).
Nune’e mós, iha Munisípiu Baukau ne’e iha labarik feto hamtuk 556 (35%) mak simu ona vasina kontra HPV, Bobonaru iha labarik feto 316 (37%), Kovalima iha labarik feto 289 (22%), Dili iha labarik feto 1.793 (106%), Ermera iha labarik feto 522 (31%), Lautein iha labarik feto 506 (56%), Likisá iha labarik feto 416 (41%), Manatutu iha labarik feto 192 (31%), Manufahi iha labarik feto 183 (27%), Vikeke iha labarik feto 368 (38%) no RAEOA iha labarik feto hamutuk 432 (23%) mak simu ona vasina kontra HPV.
Tuir nia, iha tinan 2026, vasina kontra HPV ne’e tama ona rutina ba MS nia foku ba labarik idade tinan 11 no dalabarak inan-aman mos rejeita tanba balun hakarak oan simu vasina no balun lakohi nia oan feto sira simu vasina kontra HPV.
Tanba ne’e, pesoál saúde sira labele obriga no iha inan-aman balun mós menus koñesementu ba vasina kontra HPV ne’e, tanba dalabarak sira dehan simu tiha vasina ne’e aban bainrua labarik feto sira hola mane karik sei lahetan oan ka la kous oan.
“Maibé sensibilizasaun ne’e mós ami hato’o informasaun ba komunidade nomós halo sensibilizasaun ba eskola sira, nune’e sira bele hatene benifísiu husi imunizasaun HPV ne’e,” nia hateten.
Jornalista : Felicidade Ximenes
Editór : Cancio Ximenes
