DILI, 11 Marsu 2026 (TATOLI)-Prezidente Komisaun A ne’ebé trata Asuntu Konstitusionál no Justisa, Natalino dos Santos, husu ba Komisaun Funsaun Públika (KFP) atu define nesesidade forsa traballu iha administrasaun públika.
Nia preokupa iha administrasaun públika agora rejista númeru funsionáriu boot tebes to’o rihun 70, kompostu husi kazuál, termu sertu, asesór no funsionáriu públiku.
Tuir nia, númeru ne’ebé boot la’ós iha tempu Governu Dasiak ne’e, maibé dezde uluk. “Preokupasaun pertinente, presiza duni, ne’e déver Governu Dasiak, liuliu Funsaun Públika atu haree halo ajustamentu ho padraun ida nasaun ki’ik hanesan Timór presiza funsionáriu públiku hira”, nia hato’o.
Hodi dehan reforma administrasaun públika ne’ebé la’o hela atu haree kestaun referida, nune’e komesa halo ajustamentu ba kontratu termu sertu sira. Parte komisaun rasik sei haree filafali lei númeru 8/2004 Funsaun Públika atu define didi’ak asuntu ne’e.
Komisaun A mós tau ona ajenda atu bolu KFP hodi haree kestaun ne’e.
Deputada Partidu Libertasaun Populár (PLP), Maria Angelina Sarmento Lopes, preokupa ho númeru funsionáriu iha administrasaun públika ne’ebé boot hodi fó todan ba orsamentu Estadu nian.
Jornaista: Nelson de Sousa
Editora: Maria Auxiliadora
