KOVALIMA, 12 Marsu 2026 – (TATOLI)- Ministru Planeamentu no Investimentu Estratéjiku (MPIE), Gastão Francisco de Sousa, fó-sai katak, reabilitasaun ba autoestrada iha munisípiu Kovalima, sei iha prosesu konkursu públiku.
“Ita tempu badak ami sei haree reabilitasaun kona-ba autoestrada ne’ebé monu hodi suru sedimentasaun, iha faze konkursu ona no ami hanoin mós sei tau eletrisidade,” Ministru Gastão Sousa hato’o iha resintu AMC.
Governante ne’e dehan, intensaun atu tau elétrika hodi fó naroman, nune’e bainhira iha tempu kalan halo movimentu ho transporte públiku no privadu bele fó seguransa ba sidadaun sira ne’ebé lori karreta no motorizada.
“Tau eletrisidade hodi bele fó naroman ba estrada nune’e fo seguransa ba ita lori karreta no motor movimentu iha tempu kalan,” nia dehan.
Parlamentu Nasionál (PN) aprova Orsamentu Jerál Estadu 2026 ba MPIE hamutuk $ 4.304.887
Iha 2024, Prezidente Autoridade Munisípiu Kovalima Miguel Armada Cardoso mos aprezenta pedidu ba Ministériu Obra públika hodi fó orientasaun ba Institutu Jestaun Ekipamentu Institutu Públiku ( IGE.I,P) atu hasai sedimentasaun iha autoestrada.
Lembra katak, Governu anteriór inaugura autoestrada Suai, liga ba fatuk ahu, postu administrativu Zumalai, ho nia naruk kilómetru 30.3, hodi gasta osan milliaun $304 ne’ebé konstrui husi empreza Internasionál China Overseas Engeneering Grup (COVEC).
Jornalista:Celestina Teles
Editór: Evaristo Soares Martins
