DILI, 12 Marsu 2026 (TATOLI) – Diresaun Nasionál Transporte Terrestre (DNTT) hadi’a ona mákina inspesaun ba karreta-motór sira, tanba ne’e husu ba públiku atu lori transporte bá halo inspesaun iha DNTT Komoro.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hateten mákina inspesaun antes ne’e avaria, maibé iha tinan kotuk Governu hadi’a no agora bele halo inspesaun ba transporte públiku sira.
“Bainhira halo inspesaun selu la hanesan ba karreta boot sira hanesan truck, bus no seluk tan, selu $15, karreta ki’ik $10, no motór $5. Tuir regra, veíkulu sira ne’e válidu inspesaun husi fulan 6 ba transporte públiku ho karreta boot, no ba motorizada ho kareta ki’ik tinan ida”, Nelson Sequeira Martins dehan ba Tatoli, ohin.
Karreta ho motorizada hotu ne’ebé atu halo inspesaun tenke koko uluk nia suar, no ba karreta, depoizde koko suar kontinua ba tetu todan no hakat ba teste diresaun no travaun. Aleinde ne’e, halo teste mós ba velosidade kilometrajen no seluk tan.
Objetivu halo inspesaun mak atu hatene transporte sira ne’e nia kondisaun, nomós hodi prevene poluisaun ne’ebé halo husi transporte sira. Inspesaun sira ne’e hala’o bazeia ba Dekretu-Lei númeru 06/2003, artigu 110.
Jornalista: Arminda Fonseca
Editora: Maria Auxiliadora
