OEKUSI, 12 Marsu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kinta ne’e fó ona, katak autoridade entrega ona karta informativa ba funsionáriu kontratadu no termu sira hamutuk na’in-1.597 atu ‘hapara kontratu’ iha loron 31 Marsu 2026 ne’e, bazeia ba orientasaun husi Komisaun Funsaun Públika (KFP)
Régio Salu esplika katak husi funsionáriu 1.597 ne’e, kobre diresaun hothotu, só diresaun tolu mak nesesáriu atu kontinua mantein hanesan Rejionál Saúde, Diresaun Rejionál Edukasaun no Departamentu EDTL
Notísia relevanate:PA RAEOA simu ona karta husi Governu, mandatu sei termina iha 31 Marsu 2026
Autoridade Másimu Oekusi ne’e, informa katak, karta ofisiál husi Governu Sentrál, liuhusi entidade tuteladu superintendente RAEOA, Primeiru-Ministru (PM) Kay Rala Xanana Gusmão, entrega ona karta ba autoridade tranzitóriu RAEOA iha 24 Fevereiru 2026.
Iha karta ofisiál, informa kona-ba sesa (hakotu) períodu tranzitóriu ba estrutura atuál no sesa mós kontratadu termu-sertu iha RAEOA iha loron 31 Marsu 2026 ne’e, tantu termu-sertu ba asisténsia tékniku internasionál no nasionál.
“Komesa semana kotuk, horsehik to’o ohin, funsionáriu termu-sertu balun simu ona karta atu hapara kontratu. Ha’u tenke enkoraza nafatin, ita tenke kumpre, dezde loron 01 Setembru 2025, depois ami fila husi Dili, ami iha ezersísiu atu koñese, buka hatene komprende kontextu agora, nesesidade kona-ba forsa traballu iha RAEOA,” nia hateten ba jornalista sira iha salaun alfandega Palaban, ohin.
Notísia relevanate:PA RAEOA ‘promete’ sei la kontinua kontratu funsionáriu 29 iha ZEEDOA
Entretantu, tuir dadús ne’ebé Ajénsia Tatoli,I.P asesu iha Diretór Jerál Oekusi, katak totál funsionáriu iha Oekusi hamutuk 2.842, funsionáriu permanente na’in-1.245.
Nune’e funsionáriu na’in-1.597 maioria kontratadu, komposta husi nomeasaun polítika na’in-rua (2), funsionáriu ajénte administrasaun na’in-1.284, funsionáriu kontratadu na’in-250, asisténsia téknika nasionál na’in-44, asesór nasionál na’in-ualu (8) no asesór internasionál na’in-sia (9).
Tanba ne’e, Prezidente Autoridade RAEOA, Régio Salu, hateten bainhira simu kna’ar nu’udar Prezidente Autoridade tranzitóriu,
“Ha’u rasik presiza duni tempu, atu-bele rekoñese no buka hatene, nune’e desizaun tuir mai labele sala, tenki refleta prisipíu poupansa, maibé prinsipíu investimentu valór dollar ninian, nune’e bele iha rezultadu atu dezenvololve Oekusi nu’udar modelu adminitrasaun ida-ne’ebé efikás, modelu zona ida-ne’ebé ekonómikamente kreser no bele fó benefisíu ba bein-estar povu,” nia hateten.
Notísia relevante:Koordenadór ZEEDOA prontu simu desizaun husi Governu Sentrál
Autoridade ne’e la informa totál funsionáriu termu-sertu na’in-hira mak simu ona karta, tanba númeru barak, bazeia lista forsa traballu iha Oekusi iha 2000-resin, komposta husi funsionáriu permanente 1000-resin no termu-sertu 1000-resin.
Husi funsionáriu termu-sert 1000-resin ne’e, la’os hothotu foin rekruta iha administrasaun atuál ne’e, maibé mai husi autoridade sesante sira uluk, tanba foin daudaun kriasaun ba diresaun foun tolu mak nesesidade aumenta, maibé antes aumenta mós autoridade sesante rekruta ona.
“Rekrutamentu uluk ne’e tanba iha razaun liuhusi selesaun mak tama, ha’u mai, derepenti atu hasai de’it, ne’e mós tenki iha razaun ida atu haree, maibé agora laiha razaun ona, ita kompleta ona ita-nia analiza no komprensibilidade kona-ba nesesidade duni, atu labele fó pezu maka’as ba administrasaun públika maibé fó duni nesesidade ba dezenvolvimentu setór kresimentu save sira iha térrenu atu ajuda povu ba movimentu emprendedorizmu ekonómia,” nia hateten.
Maibé nia esplika, hafoin entrega karta informativa sesa ne’e, faze tuir mai sei rekrutamentu fali maibé liuhusi konkursu públiku, hodi kumpre orientasaun Komisaun Funsaun Públika, katak tenki tuir padraun funsaun públika nian kona-ba nomeasaun no rekrutamentu.
“Ha’u husu ba maun alin Oekusi-oan sira, ita tenki la’o tuir ritmu ne’ebé iha, nune’e ita aprende mós atu haree ita-nia rai Oekusi ne’e, sá modelu sá ritmu no empeñamentu ne’ebé di’akliu atu halais fó rasionalidade no fó razaun ba Governu no Estadu ba polítiku sira katak, opsaun ne’e tenki hanesan ne’e,” nia hateten.
Notísia relevante:PA RAEOA enkontru urjente ho membru autoridade prepara relatóriu ‘hand-over’
Diresaun tolu nesesáriu mentein
Prezidente Autoridade ne’e, afirma dirsaun tolu hanesan saúde, edukasaun no EDTL tenki mantein nafatin, maib’e sei haree fila-fali serbisu tékniku sira, exemplu funsaun dupla, tuir loloos ema rua de’it maibé iha ema na’in-haat kedas kaer serbisu ida de’it, entaun tenki minimiza.
Notísia relevanate:PA RAEOA klarifika: “La’ós karta ezonerasaun”
Entretantu, tuir dadus ne’ebé Ajénsia Tatoli,I.P asesu iha Diretór Jerál Oekusi, katak totál funsionáriu iha Oekusi hamutuk 2842, komposta husi nomeasaun polítika na’in-rua (2), funsionáriu permanente na’in-1.245.
Nune’e mós funsionáriu ajénte administrasaun na’in-1.284, funsionáriu kontratadu na’in-250, asisténsia téknika nasionál na’in-44, asesór nasionál na’in-ualu (8) no asesór internasionál na’in-sia (9).
Jornalista: Abílio Elo Nini
Editór: Rafael Ximenes de A. Belo
