DILI, 12 Marsu 2026 (TATOLI)-Bankada Frente Revolusionária Timor-Leste Independente (FRETILIN) apoiu inisiativa Governu Dasiak nian kona-ba alterasaun Lei Partidu Polítiku, hodi garante valór demokrasia.
Deputadu FRETILIN, Joaquim dos Santos, hateten tuir bankada nia haree katak ida-ne’e importante no Governu tenke redefine norma ne’ebé regula partidu atu garante valór demokrasia Estadu nian tuir Konstituisaun.
Ho ida-ne’e mak hahú kedas iha partidu nia laran, liga ba organizasaun, atividade polítika, nune’e filiadu partidu polítiku sira liuhusi sira-nia organizasaun iha responsabilidade konjunta atu defende valór demokrátiku iha Timór.
“Tanba ne’e partidu hothotu konxiente, bainhira lei ne’e entrada ein vigór, tenke kumpre lei ne’ebé Parlamentu aprova, atu idaidak hadi’a ninia organizasaun partidária”, Joaquim hateten ba Tatoli iha Parlamentu, ohin.
Nia dehan katak FRETILIN laiha objesaun ba artigu hitu ne’ebé Governu propoin atu halo alterasaun iha lei vijente, tanba mai atu hadi’a norma ne’e no garante partidu sira defende demokrásia no hadi’a sira-nia uma laran.
Membru Komisaun A ne’ebé trata Asuntu Konstitusionál no Justisa ne’e rekomenda ba Governu bainhira lei ne’e tama vigór tenke prodús norma komplementár iha dekretu ne’ebé iha no define kompeténsia Ezekutivu nian liga ba prosesu rejistu partidu no prosesu pré-eleitorál.
Prezidente Komisaun A, Natalino dos Santos, relata mós katak Komisaun aprova ona relatóriu no pareser ba testu finál debate espesialidade ba proposta lei númeru 26/VI(3a), alterasaun daruak Lei númeru 3/2004, 14 Abríl, Lei Partidu Polítiku, no agora submete kedas ba meza Parlamentu hodi ajenda diskusaun no aprovasaun finál globál iha plenária iha semana oin.
Notísia relevante: https://tatoli.tl/2026/03/11/lei-foun-ezije-partidu-sira-tenke-iha-sede-iha-munisipiu-hotu/
Jornalista: Nelson de Sousa
Editora: Maria Auxiliadora
