OEKUSI, 17 Marsu 2026 (TATOLI) – Rozina Ote ho idade tinan-22, mate tara-aan iha haris-fatin laran, iha bairru Masin suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Família matebian Jacinto Nessi, konta sai, kronolojia ho matabeen katak, akontesimentu ne’e akontese iha loron tersa-feira dadersan, maizmenus tuku 05:00 besik rai loron ona, matebian hadeer uluk, hodi loke odamatan tama ba haris-fatin.
Hafoin dadersan, família sira hadeer hodi ba haris-fatin, maibé odamatan taka metin hela, nune’e família sira bolu no dere odamatan, maibé la loke, tanba ne’e família sira deside sobu tiha odamatan haris-fatin mak foin haree matebian tara-aan hela iha haris-fatin laran no laiha ona iis.
“Ha’u hadeer mai lansung ba kose nehan, depois atu ba haris iha haris-fatin, maibé to’o ne’ebá odamatan taka metin loke ladi’ak, ha’u bolu maibé laiha ema ida hatan, entaun ha’u bolu ha’u-nia ferikoan, dehan mai lai, ha’u loke odamatan ladi’ak semak iha laran,” nia dehan ba jornalista sira iha bairru Masin, ohin.
“Ha’u-nia ferik-oan mai to’o, bolu tan maibé laiha ema ida atu hatan, entaun ami deside sobu de’it odamatan ne’e, depois ami sobu tiha, haree alin tara-aan hela no iis laiha ona,” nia afirma.
Notísia relevante:Família klarifika Hermenegildo Pereira tara-aan iha rezidénsia bairru Oébau
Nia informa, to’o matebian hakotu iis, família sira seidauk hatene movtivu husi akontesimentu ne’e, tanba antes ne’e iha kalan, matebian kondisaun di’ak hela, maibé derrepente dadersan nia alin feto mate ho kondisaun tara-aan.
“Horikalan nia di’ak hela, laiha problema, tanba ha’u hela ho nia dezde sei ki’ik to’o boot, maibé derepenti de’it akontese hanesan ne’e, ami mós bingung (konfuzaun), tanba matebian mós agora serbisu hela loja Xineza ida iha Masin,” nia hateten.
Notísia relevante:EFP lakon vida, suspeitada tara-aan iha Larisula
Hafoin akontese kazu ne’e, Polísia Nasionál Timor-Leste (PNTL) Oekusi, liuhusi seksaun investigasaun halo kedas identifikasaun hodi rekolla dadus sira atu submete ba prosesu investigasaun ba motivu husi akontesimentu tara-aan ne’e.
Entretantantu, matebian moris iha loron 02/12/2004 iha aldeia Oamna suku Usitaku sub-rejiaun Nítibe husi aman Martinho Ote ho nia ian Angelina Quefi.
Notísia relevante:Kazu tara-aan iha Bobonaro, Família deside taka prosesu investigasaun
Tuir observasaun Jornalista Ajénsi Tatoli,I.P iha terrenu, matebian mate tara-aan iha haris laran ho hena rohan ida kesi ba iha besi-baza, no hena kesi metin iha parte kakorok hodi rezulta matebian hakotu iis.
Dadaun ne’e família sira evakua ona mate isin ba nia rai moris fatin iha aldeia Oamna suku Usitako sub-rejiaun Nítibe hodi hala’o seremonia funebre.
Jornalista: Abílio Elo Nini
Editór: Rafael Ximenes de A. Belo
