DILI, 23 Marsu 2026 (TATOLI)–Prevedór Direitu Umanu no Justisa, Virgílio da Silva Guterres ‘Lamukan’ prefere Tribunál Rekursu (TR) halo fiskalizasaun abstrata ba desizaun Ministru Interiór, Francisco da Costa Guterres ne’ebé deside la halo promosaun deviza ba Superintendente Polísia Julia da Gama, iha Sábadu foin daudaun ne’e.
“Ami sei haree prosesu promosaun, se ne’e bazeia ba kompeténsia Komandu nian ka Governu, liliu Mínistériu Interiór atu halo, maibé buat ne’ebé PDHJ (Provedoria Direitu Umanu no Justisa) atu tama iha laran katak kualker desizaun ne’ebé atu promove ofisiál públiku sira tenke respeita ba prinsípiu boa-governasaun, katak ita halo dekretu ka diploma ruma tenke baze ba lei no analize kle’an, katak ema ne’ebé mak ita atu promove ne’e la’ós tanba nia mane ka nia feto ou la’ós tanba nia besik ita,” Prevedór Vírgilo hateten ba Jornalista sira iha ninia knaar fatin, Praia dos Coqueiros, Segunda ne’e.
Notísia relevante : Superintendente Julia da Gama lamenta kanselamentu promosaun iha PNTL
Nia nota, Primeiru-Ministru, Kay Rala Xanana Gusmão durante vizita iha munisípiu sira, hato’o kompromisu atu hadi’a instituisaun Estadu sira liuhusi evita familiarizmu no nepotizmu.
“Labele haree ema tanba ita-nia família, maibé nia merese duni liu prosesu sira ne’ebé entidade tau, katak nia respeita Kódigu Konduta no prosedimentu promosaun ne’ebé iha no nia iha ne’ebá duni. Agora se ema ne’e tama tiha lista atu ba formatura mak hasai ne’e hamosu kestaun no ami sei halo fiskalizaun ba ida-ne’e,” nia akresenta.
Maski nune’e, PDHJ seidauk bele halo konkluzaun katak aktu ne’e nu’udar violasaun ba direitu umanu.
“Ami presiza halo fiskalizasaun, maibé pelu menus sentimentu injustisa ne’e mosu ona iha ema. Ema ida-ne’ebé sai vítima ba prosesu ne’e, tanba últimu minutu, pesoalmente katak nia família hatene ona, nia oan sira hatene ona, nia família barak mós hatene ona katak nia atu promove, dala ruma sira prepara tan atu ba partisipa ninia promosaun, mas depois nia la mosu iha ne’ebá, sentimentu justisa ne’e ema ne’e sofre ona,” nia katak.
Virgílio dehan, agora presiza halo fiskalizasaun atu haree kuandu desizaun la tuir prosedimentu ou padraun boa governasaun maka bele dehan violasaun direitu umanu.
Jornalista : Natalino Costa
Editora : Julia Chatarina
