BOBONARU, 24 Marsu 2026 (TATOLI) – Udan-boot ne’ebé tun durante loron hirak ikus ne’e la’ós hakotu de’it ponte Bulobu, maibé taka dalan ba futuru estudante na’in-50 iha suku Manapa, postu administrativu Kailaku.
Alunu sira iha área ne’e, daudaun labele asesu bá Eskola Bázika Sentrál (EBC) Samutaben durante semana ida, tanba ponte ne’ebé sai ligasaun prinsipál entre komunidade no eskola, agora kotu totál kauza husi korrente mota ne’ebé maka’as.
Iha loron 17 Marsu, momentu ne’ebé alunu sira fila husi aula, sira hasoru realidade ne’ebé la espera, ponte ne’e kotu. Sira tenke hein oras naruk, husi loraik to’o kalan, bokon hotu, atu hakat mota ne’e. Balun konsege liu ho risku aas, maibé seluk hein ho ta’uk, haree bee mota ne’ebé kontinua sa’e. Situasaun ne’e halo Diretór Eskola, Umbelino Borges, sente preokupadu.
Notísia relevante: MOP monta kontentór lima hodi normaliza ponte Bulobu
“Ha’u laran-taridu loos, ta’uk mota lori. Loron tuir fali mai, ami tau de’it ai iha ponte mak sa’e tuir. Tuir fali mai labele liu ona, tanba ponte ne’e kotu totál difikulta alunu sira atu hakat mai sorin”, nia relata ba jornalista, ohin.
Dezde seman ida liubá, alunu sira husi mota sorin la marka prezensa iha aula, maski eskola laiha feriadu, maibé realidade iha terrenu obriga sira atu hela iha uma. “Ha’u labele obriga sira atu mai eskola. Se buat ruma akontese, sé mak sei responsabiliza?”, nia hatutan.
Kestaun ne’e la’ós afeta de’it edukasaun. Komunidade Kailaku mós hasoru susar atu lori produtu lokál bá merkadu, liuliu bainhira iha kazu emerjénsia saúde.
Natalino Barros, membru komunidade, konta katak iha inan ida isin-rua ne’ebé presiza atu hakat mota, ho riksu boot ba nia no bebé ne’ebé sei iha kabun laran. “Horisehik akontese maun ida ho nia kaben kondisaun grávida. Sira na’in-rua hakur mota, bee lori sira rua husi leten bá to’o kraik. Graças a Deus ita nia inan-feto ho labarik iha nia knotak ne’e mós laiha buat ida”, nia dehan.
Nia husu ba Ministériu Obra Públika no IGEADI ne’ebé halo ponte provizóriu atu transporte liu, maibé ne’e gasta de’it osan, tanba la kle’ur de’it bee mai sobu, nune’e sujere atu hadi’a ponte ne’e para bee labele sobu ona.
Diretór Servisu Munisipál Obra Públika, Autoridade Munisípiu Bobonaru, Marcelino Godinho, hateten Governu seidauk bele halo normalizasaun ba ponte referidu tanba korrente bee-mota maka’as.
“Ita halo ona koordenasaun ho IGEADI Brigada Maria Tapó. Ita halo ona mobilizasaun kontentór mai iha ne’e, ense hela rai-henek atu fasilita hela movimentasaun bá-mai, maibé situasaun ne’ebé ita enfrenta agora ne’e natureza, udan la fó fatin”, nia salienta.
Marcelino mós husu komunidade nia pasiénsia, tanba Governu tau ona prioridade atu rezolve estrada no ponte iha Kailaku.
Daudaun ne’e, komunidade sira hala’o estafeta iha mota-laran ba sasán no transporte hanesan motorizada no seluk tan.
Ponte Bulobu, ne’ebé uluk sai dalan ba komunidade agora tranforma ba obstákulu ne’ebé taka asesu ba edukasaun saúde no ekonomia lokál.
Notísia relevante: PN solisita ba IGEADI halo intervensaun urjente ba ponte Bulobu
Jornalista: Sergio da Cruz
Editora: Maria Auxiliadora
