DILI, 30 Marsu 2026 (TATOLI) – Militár Indonézia ida hosi forsa manutensaun pás Nasaun Unidas nian iha Líbanu (UNIFIL, sigla inglés) mate iha konflitu entre Hezbollah no Izraél.
Informasaun ne’e hato’o husi Sekretariu Jerál ONU Antonio Guterres liuhusi Plataforma X Iha segunda, 30 Marsu.
“Ha’u kondena maka’as insidente iha loron-domingu ne’ebé manutensaun dame indonézia ida ho UNIFIL mate iha ostilidade sira entre Izraél ho Hezbollah,” nia hatete.
Guterres mós afirma katak membru UNIFIL Indonézia ida seluk hetan kanek todan iha akontesimentu ne’e.
Nia hato’o sentidu kondolénsia ba povu Indonézia, liuliu ba família no kolega vítima sira, no hato’o nia esperansa ba rekuperasaun lalais ba pesoál sira ne’ebé kanek.
Tuir Guterres, akontesimentu ne’e halo parte iha série akontesimentu ne’ebé tau iha perigu seguransa ba manutensaun pás nian.
“Ha’u husu ba parte hotu-hotu atu kumpri sira-nia obrigasaun sira tuir lei internasionál no garante seguransa hosi pesoál sira no propriedade ONU nian iha momentu tomak,” nia hatete.
Tensaun sira kontinua aumenta iha Médiu Oriente hafoin Estadu Unidus Amérika no Izraél ataka Iraun iha loron 28 fulan-Fevereiru tinan 2026.
Iraun hafoin ne’e lansa atake sira vingansa nian hasoru Izraél no área oioin ne’ebé maka iha ativu militár norte-amerikanu sira iha rejiaun.
Konflitu ne’e da’et ba Líbanu hafoin grupu Hezbollah hamutuk iha atake sira hasoru alvu militár oioin iha Izraél.
Atake vingansa izraélita sira nian tuir informasaun oho libanés liu 1,000 no hakanek ema rihun-resin.
Fronteira Israel-Líbanu mós hetan vítima sira entre pesoál sira UNIFIL nian hosi nasaun oioin.
Ministériu Negósiu Estranjeiru Indonézia nian antes ne’e subliña katak seguransa pesoál Kontinjente Garuda nian sai nafatin prioridade.
“Governu indonéziu kontinua akompaña hela situasaun no nia impaktu ba Kontinjente Garuda”, afirma ajénsia notisioza Indonézia nian liuhusi iha loron 14 fulan-Marsu liubá.
Notisia relevante: Konfirmadu husi Mídia Estatál, Líder Supremu Iraun mate ona
