BAUCAU, 02 Abríl 2026 (TATOLI)—Autoridade Munisipál Baucau (AMB) ezekuta ona orsamentu jerál estadu (OJE) tinan-2026 hamutuk pursentu 17,18 durante iha trimestrál dahuluk (Janeiru-Marsu).
“Ita update kada loron entaun to’o ohin dader taxa ezekusaun atinje pursentu 17,18 husi orsamentu kategoria lima ne’ebé aloka iha tinan-ne’e,” Sekretáriu Munisipál Asuntu Administrasaun no Finansa, Juvinal Daniel Filipe hateten iha ninia kna’ar fatin, Vila Nova, Baukau, Kinta ne’e.
Juvinal Belo relata husi totál orsamentu ne’ebé iha, ezekusaun ba saláriu no vensimentu ba funsionáriu permanente no kazuál atinje pursentu 24,02 iha-ne’ebé totál despeza $684.678,76 no balansu $2.166.063,24, bens no servisu ezekuta pursentu 58,41 ho totál despeza $50.306,56 ne’ebé aloka ba kombustivel, operasionál diária no manutensaun iha-ne’ebé atuál balansu hamutuk $318.426,69.
Aleinde ne’e, transferénsia públika ezekuta pursentu 14,09 ne’ebé aloka ba Programa Merendár Eskolár (PME), subsidiu ba autoridade suku ho balansu $6.636.686,50 iha-ne’ebé despeza hamutuk $999.653,50, kapitál menór ezekuta ona pursentu 100 ne’ebé kompromisu ba sosa ekipamentu pezadu ida (eskavatór) ho alokasaun orsamentu $150.000,00.
Enkuantu, kapitál dezenvolvementu seidauk ezekuta tanba atualiza orsamentu tuir oreintasaun husi Ministériu Finana (MF) iha-ne’ebé aloka projetu PDIM ho totál orsamentu hamutuk $2.310.213,00.
“Kategoria rua hanesan transferénsia públika no kapitál dezenvolvimentu sei ezekuta iha semana-oin nune’e ita espera taxa ezekusaun sei sa’e iha fulan-ne’e,” Juvinal Filipe akresenta.
Nia hatutan prosesu ba kategoria rua hanesan transferénsia públika mós iha faze ezekusaun tanba aloka ba Programa Nasionál Dezenvolvimentu Suku (PNDS) ne’ebé foin iha faze aprovizionamentu.
Nune’e, husi ezekusaun orsamentu trimestrál dahuluk totál despeza atuál hamutuk $1.734.638,82, obigasaun $84.408,75, kompromisu $551.648,00 no balansu $11.431.389,43.
Autoridade Baukau ba tinan 2026 hetan alokasaun orsamentu hamutuk $13.802.085,00 ne’ebé fahe ba kategoria lima hanesan saláriu no vensimentu $2.850.742,00, bens no serbisu $765.550,00, transferénsia públika $7.725.580,00, kapitál menór $150.00000 no kapitál dezenvolvimentu hamutuk $2.310.213,00.
Jornalista: Natalino Belo
Editór: Xisto Freitas da Piedade
