DILI, 02 Abríl 2026 ( TATOLI)—Sekretaria Estadu Komunikasaun Sosiál (SEKOMS) no Sentru Audivisuál Max Stahl Timor-Leste (CAMSTL), Kinta ne’e, asina akordu ba apoia osan subvensaun públika hodi kontinua atividade dijitalizasaun hodi prezerva produtu jornalístiku husi mídia estatál rua, Ajénsia TATOLI, I.P no RTTL, E.P.
Asina akordu entre instituisaun rua ne’e reprezenta husi Sekretáriu Estadu Komunikasaun Sosiál, Expedito Dias Ximenes, no Diretór Ezekutivu CAMSTL, Edicito Pinto.
“Prontu kooperasaun ida atu kontinua dijitaliza matéria produtu jornalista husi RTTL ne’ebé tinan barak sei analog inklui TATOLI. Sira (CAMSTL) hakarak sira ho sira-nia mákina no ekipamentu ne’ebé sira iha bele transforma husi analog ba dijitál,” Sekretáriu Estadu Expedito hato’o ba jornalista sira hafoin asina akordu iha salaun enkontru SEKOMS, Palásiu Governu.
Notísia relevante : SEKOMS no CAMSTL lansa plataforma dijitalizasaun ba arkivu husi TATOLI, I.P no RTTL, E.P
Governante ne’e haktuir, akordu ne’e la’o ona, tinan uluk CAMSTL konsege rekolla RTTL nia kasete ho formatu DVD no BetaCam ne’ebé hahú kedan tinan 1999, 2002 to’o 2017 inklui mós TATOLI nia produtu.
“Husi serbisu ne’ebé sira halo husi kasete ho formatu DVD no BetaCam, RTTL, E.P nian ne’ebé atu transforma husi analog ba dijitál ne’e hamutuk 7.000, husi númeru ne’e Sentru Audivisuál Max Stahl konsege dijitaliza ona 200, ne’ebé sei hela balun tan, 6.000-resin ne’ebé ita kontinua serbisu hamutuk hodi dijitaliza produtu kasete husi analog ba dijitál,” Governante ne’e akresenta.
Iha fatin hanesan, Diretór Ezekutivu CAMSTL, Edicito Pinto, hateten, nia parte komprometidu atu serbisu hamutuk ho SEKOMS atu prezerva produtu jornalístiku.
“Akordu kooperasaun ne’ebé CAMSTL no SEKOMS halo ne’e foku ba kestaun tolu mak hanesan primeiru prezerva produtu jornalístiku mídia estatál RTTL no TATOLI husi analog ba dijitál nu’udar arkivu ba dokumentu Estadu, segundu mak halo arkivamentu ho sistema dijitál ne’ebé modernu liu ne’ebé ema hotu bele asesu no terseiru mak ba dizamina asaun sira,” nia katak.
Jornalista : Natalino Costa
Editora : Julia Chatarina
