DILI, 06 Abríl 2026 (TATOLI)–Sidadaun ida ne’ebé suspeitadu moras mentál, Segunda ne’e, maizumenus tuku 17:10, ho tudik iha lima sona ema na’in-haat iha área Komoro, Kampung Baru, Postu Administrativu Dom Aleixo.
Ema na’in-haat ne’e la’o halimar iha dalan, nune’e derrepente suspeitu lori tudik sona sira. Hafoin akontesimentu ne’e, komunidade ne’ebé iha fatin akontesimentu salva kedan vítima sira.
Komunidade lori kedan vítima na’in-haat bá Sentru Saúde Komoro, ne’ebé entre vítima sira, na’in-tolu hetan kanek grave no na’in-ida ho idade hitu hakotu iis tanba hetan sona iha parte kakorok.
Hafoin akontesimentu ne’e, Polísia Eskuadra Dom Aleixo to’o kedan iha fatin akontesimentu hodi asegura kedan suspeitu.
Notísia relevante : Joven hetan sona iha kakorok halo ona tratamentu intensivu
Komandante Polísia Nasionál Timor-Leste (PNTL) Munisípiu Dili, Komisáriu Asisténte Polísia, haktuir, nia parte hetan informasaun kona-ba kazu omesídiu ne’e.
“Sim, sira viziñu informa katak suspeitu ne’e moras mentál. Suspeitu kapturadu agora detenin 72 oras,” Komisáriu Asistente Orlando Gomes, hato’o ba Ajénsia TATOLI via telefónika, Segunda ne’e.
Nia informa, suspeitu nu’udar joven ida, daudaun parte Polísia investiga hela kazu ne’e.
“Nia sona katuas ida, na’in-tolu ne’e ema minoridade no iha kazu ne’e na’in-tolu mak grave, ida mak mate,” nia katak.
Hafoin akontesimentu Forense Komandu Jerál PNTL mai kedan fatin akontesimentu hodi transporta mate-isin inklui vítima na’in-tolu bá Hospitál Nasionál Guido Valadares ho Ambulánsia hodi kontinua hetan tratamentu intensivu.
Jornalista : Natalino Costa
Editora : Julia Chatarina
