ERMERA, 08 Abríl 2026 (TATOLI)—Ministériu Obra Públika (MOP) liuhusi Xefe Gabinete no ekipa tékniku halo akompañamentu ba empreza China Civil Engineering Construction Corporation (China) hodi mobiliza no entrega ekipamentu konstrusaun projetu reabilitasaun estrada diresaun Glenu ba Letefoho nian ba Prezidente Autoridade Munisípiu no populasaun Ermera.
Projetu reabilitasaun estrada urbana iha Glenu nian, empreza manán-na’in antes ne’e halo ona mobilizasaun ekipamentu ba Glenu no daudaun ne’e kontinua hela prosesu implementasaun servisu iha terrenu.
Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hateten ohin loron sira akompaña empreza mobiliza ekipamentu faze dahuluk hanesan eskavatór, silindru, fuzu, loder no seluk tan ne’ebé uza hodi reabilita estrada diresaun Glenu ba Letefoho, entaun ohin
“Tanba ne’e sei kontinua kedas halo servisu iha terrenu hanesan ateru dalan no loke espasu ba dalan nian hodi fasilita movimentasaun transporte no mákima boot sira-ne’e bele liu ba to’o iha Gulolo nian. Semana ne’e ba oin faze dahuluk hahú servisu ona,” Germano Santa Brites informa ba jornalista sira iha Glenu, Ermera, ohin.
Nia hatutan, ekipamentu sei mobiliza tan iha faze daruak nian, tanba tribunál da contas finaliza ona sira-nia vistu ba projetu ida-ne’e, kuazé prosesu ne’e la’o kle’ur uitoan tanba uza fundu imprestímu.
Tanba ne’e, nia husu ba komunidade atu koopera no labele impede prosesu ida-ne’e, no kuidadu fasilidade sira tanba dezenvolvimentu ne’e benefísiu direta ba komunidade.
Prezidente Autoridade Munisípiu Ermera, José Martinho Soares, sente orgullu tanba momentu ida-ne’e mak povu Ermera hein hela durante tempu naruk, to’o sira insulta malu.
“Maibé, ohin, hakarak hatudu ba komunidade katak dezenvolvimentu mak mai duni ona ne’e. Tanba ne’e, ami fiar katak hahú semana ida-ne’e nia laran, empreza bele halo ona servisu dahuluk nian. Entaun, ohin mós ita hamutuk iha ne’e hodi haree ho matan katak Governu nunka bosok,” nia hateten.
Nia hatutan, ho prosesu dezenvolvimentu ne’e komunidade afetadu hamutuk 238, iha 97% mak koopera ona no iha 3% mak seidauk ka sei iha diálogu tanba komunidade balun hakarak kustu indemnizasaun latuir padraun tabela ministériu maibé hakarak ka lakohi estrada Gelu ba Letefohe tenke normaliza.
“Ha’u garante prosesu sira-ne’e sei la’o ho di’ak tanba iha servisu koordenasaun atu garante seguransa ba mákima sira no empreza nia servisu iha terrenu,” nia dehan.
Xefe Gabinete Ministériu Obra Públika, Cristovão Fausto Guterres, hateten husi parte MOP nian esforsu kontinua garante dezenvolvimentu infraestrutura baze ba baze, nune’e ohin sira hahú mobiliza ekipamentu sira ba fatin konstrusaun nian.
“Ami orienta ona ba konsultan no kontratór atu bele hahú ona servisu tanba komunidade balun sei kestiona prosesu reabilitasaun ne’e kle’ur tebes maske antes ne’e halo ona lansamentu, maibé atu dehan de’it katak osan imprestímu ne’e, ita tebke halo prosesu faze ba faze to’o ramata mak foin bele implementa obra ne’e,” nia esplika.
Nia husu mós ba komunidade afetadu sira atu koopera ho Governu nune’e bele aselera servisu ho lalais, tanba bazeia ba kontratu obra ida-ne’e sei ramata iha tinan ida-resin.
Aleinde ne’e, nia mós komunika ona ho ekipa tékniku destakadu sira atu kontinua halo monitorizasaun ba projetu ida-ne’e ho di’ak tuir padraun.
Iha biban ne’e, Reprezentante Komunidade, Domingos Maia, hateten katak hanesan benefisiáriu ida obrigatoriamente nia sei koopera ho Governu ba prosesu dezenvolvimentu iha Ermera, tanba sira hein no terus durante tinan barak nia laran ona.
“Ami sei ajuda Governu tau matan ba fasilidade sira no servisu hamutuk ho empreza atu aselera obra ne’e rasik, tanba ami hakarak uza ona dalan ne’e no lori produtu ba faan iha merkadu,” nia hateten.
Antes ne’e, iha 26 Janeiru 2026, Governu liuhusi Ministériu Obra Públika ne’ebé akompañadu husi Primeiru-Ministru, Kay Rala Xanana Gusmão, inklui entidades hotu halo lansamentu ona ba projetu refere.
Projetu estrada ne’e kobre dalan husi Letefoho (km 30+230) to’o Gleno (numeru kontratu sei halo 54+370), ho TENDER/191/MOP-2024, konstrusaun durante loron 365 ho orsamentu $38,800,054.00, ne’ebé implementa husi China Civil Engineering Construction Corporation (China).
Aleinde ne’e, projetu Estrada Urbana Glenu no sistema drainajen mós sei konstrui ho pakote rua ho durasaun tinan ida. Pakote 1 ho orsamentu $2,640,762.21 no pakote 2 ho orsamentu $3,214,929.67, ne’ebé sei implementa husi kompania Shabryca Construction Unipesoál, Lda.
Notísia Relevante: Lansa Projetu Estrada Glenu-Letefoho, PM Xanana : Imi hein kleur duni
Jornalista : Alexandra da Costa
Editór : Cancio Ximenes
