DILI, 08 Marsu 2026 (TATOLI)-Ministru Transporte no Komunikasaun, Miguel Marques Manetelu, hateten daudaun sira-nia parte seidauk bele hasai tarifa ba transporte públiku sira tanba sei hein ekipa taskforce tuun halo fiskalizasaun ba Dekretu-Lei kona-ba medida ba estabilizasaun temporária folin kombustível no seguransa fornesimentu, ne’ebé aprova ona iha loron 25 Abríl 2026.
Nia esplika, ekipa taskforce ne’e rasik kompostu husi Ministériu Petróleu no Rekursu Minerál (MPRM), Ministériu Administrasaun Estatál (MAE), no Ministériu Interiór (MI), objetivu husi ekipa Taskforce ne’e mak oinsá ekipa halo fiskalizasaun ba Dekretu-Lei referidu, no rona mós opiniaun husi na’in ba transporte públiku sira molok foti desizaun hasa’e tarifa.
Membru Governu ne’e hateten, nia parte rona ona informasaun no iha relatóriu, katak transporte públiku parte leste nian hanesan Vikeke halo greve hahú horiseik no tuir informasaun segunda semana oin mak karreta sei halai fali.
Nune’e parte Aileu horiseik halo ona diálogu ida kona-ba preokupasaun mina sa’e ne’e, tanba ne’e ohin nia parte ko’alia ona ho Ministru Administrasaun Estatál, Tomas Cabral no Ministru Interiór, Francisco da Costa, hanesan ekipa taskforce oinsá hasai despaixu ba Autoridade Munisípál sira, no Komandante sira iha munisípiu atu halo reuniaun ba na’in transporte sira.
“Ami ministériu hasa’e tarifa hein rezultadu husi diálogu, mak foin deside tarifa tanba konkluzaun hotu sei hetan liuhusi diálogu entre ekipa taskforce ho na’in ba transporte públiku sira” Miguel Marques, ba Tatoli iha Palásiu Governu, Dili, Kuarta ne’e.
Nia hateten, bainhira rezultadu iha ona mak ministériu sei fó sai ba públiku kona-ba aumenta tarifa ba transporte sira husi munisípiu mai Dili ne’e hira no internál munisípiu ne’e hira.
Notísia relevante:Motorista Baukau husu DNTT hasa’e folin transporte publiku
Autoridade governativa ne’e dehan, desizaun hotu sei foti bainhira ekipa halo ona diálogu ho na’in ba transporte públiku sira maibé, tanba mina nia folin uluk seidauk krize ho folin $1,20 agora sa’e ba $1,50 ida-ne’e sa’e la’ós pursentu 100 entaun presu ne’ebé atu aumenta ba tarifa transparente públiku mós labele sa’e pursentu 100 tenke sa’e tuir pursentu folin mina nian, ida-ne’e mak sira sei halo iha diálogu ne’e.
Tuir nia, diálogu ne’e rasik Ministériu Transporte no Komunikasaun la envolve ba ekipa Taskforce, maibé desizaun diálogu iha ona ministériu sei haree presu ba tarifa nian.
Notísia relevante: Kombustível Folin Sa’e: Motorista Transporte Públiku Vikeke husu Governu hasa’e tarifa
Jornalista: Arminda Fonseca
Editór: Rafael Ximenes de A. Belo
