DILI, 10 Abríl 2026 (TATOLI)-Komisaun C, ne’ebé trata Asuntu Finansa Públika, iha tempu badak sei bolu urjente Komisaun Funsaun Públika (KFP) ho Ministériu Finansa (MF) hodi justifika kona-ba prosesu ajustamentu ba kontratu termu sertu ne’ebé kauza atrazu ba saláriu funsionáriu sira iha liña ministeriál no instituisaun públika sira.
Prezidente Komisaun C, Cedelízia Faria dos Santos, afirma katak Komisaun tau ona iha ajenda fulan ida ne’e nia laran. Nia dehan katak bainhira Komisaun hala’o fiskalizasaun iha munisípiu, funsionáriu sira hato’o preokupasaun kona-ba problema ne’e.
Deputada husi bankada Kongresu Nasionál Rekonstrusaun Timorense (CNRT, sigla portugés) apoia polítika Governu liuhusi KFP no MF kona-ba reforma administrasaun públika ne’ebé la’o daudaun ho introdusaun dekretu-lei foun númeru 3/2026 kona-ba rejime kontratu termu sertu iha administrasaun públika.
Nia konsidera sistema ne’e di’ak, maibé presiza aselera implementasaun hodi labele fó impaktu fali ba saláriu funsionáriu sira nian.
“Ami preokupa, tanba barak la simu saláriu duni. Se nia serbisu ona iha direitu simu saláriu. Labele prosesu ida ne’ebé ita-tau atu mellora, depois fó impaktu fali ba [funsionáriu] ninia moris iha família nian. Ha’u mós ladun konkorda,” Cedelízia Faria dos Santos, hateten iha Parlamentu, ohin.
Lembra katak, Konsellu Ministru aprova ona iha fulan-Janeiru tinan ne’e, dekretu-Lei númeru 3/2026, loron 3 fulan Fevereiru, kona-ba Rejime Jurídiku ba Kontratu Traballu ho Termu Sertu iha Administrasaun Públika.
Diploma ida-ne’e ho objetivu prinsipál atu estabelese rejime jurídiku ida ne’ebé klaru, uniforme no transparente hodi selebra, jere no fiskaliza kontratu traballu ho termu sertu iha Administrasaun Públika, hodi garante utilizasaun ida ne’ebé responsavel ba rekursu umanu no finanseiru Estadu nian hodi hatán ba nesesidade temporária servisu nian.
Rekorda mós katak to’o iha loron 07 Fulan-Abríl, KFP rejista liña ministériu no instituisaun públiku hamutuk 94 ho númeru funsionáriu hamutuk rihun 19-resin mak halo ona reajustamentu tuir dekretu-lei foun, husi númeru ne’e 17.475 simu ona saláriu.
Notísia relevante : TATOLI, I.P no KFP diskute aplikasaun dekretu-lei foun
Jornalista: Nelson de Sousa
Editora: Isaura Lemos de Deus
