DILI, 13 Abríl 2026 (TATOLI)-Komisaun Anti-Korrupsaun (CAC, sigla portugés) rekolla $303,628.38 husi infratór ne’ebé aprezenta deklarasaun rikusoin tarde durante tinan 2025.
Asuntu hatoo hosi Komisáriu CAC, Rui Pereira, ne’ebé akompaña hosi ekipa, ohin aprezenta relatóriu anuál kona-ba atividade instituisaun nian ne’ebé hala’o iha tinan kotuk, ba Parlamentu Nasionál.
Tuir relatóriu ne’e, durante tinan 2025, CAC konsege rejista deklarasaun hamutuk 10.972 no aplika sansaun ba infratór hamutuk 2.398 ho totál valór multa $303,628.38.
CAC mós halo verifikasaun ba deklarante sira, inklui emite notifikasaun 170 no halo auditoria ba deklarasaun 44.
Lembra katak, hafoin Lei númeru 7/2020 kona-ba Medida Prevensaun no Kombate Korrupsaun (MPCC, sigla portugés) tama ein vigór iha loron 22 fevereiru 2021, maka ekipa hosi CAC hahú halo diseminasaun ba ajente públiku, liuliu kargu xefia sira.
Lei MPCC iha artigu 29 to’o 30 ne’e obriga ajente públiku sira ne’ebé kaer hela kargu polítiku no kargu xefia iha instituisaun Estadu, diretór nasionál to’o mai xefe departamentu iha obrigasaun atubele aprezenta sira-nia deklarasaun bens no interese.
Funsionáriu Estadu ne’ebé asume kargu xefia sei deklara sira-nia rikusoin inklui sira-nia família ba CAC bainhira lei ne’e hahú implementa.
Iha kapítulu II Rejime Deklarasaun Bens no Interese, artigu 28 obriga kualkér sidadaun ne’ebé asume kargu públiku tenke deklara ririkusoin.
Natureza husi artigu ne’e ko’alia kona-ba ema sira ne’ebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu no funsionáriu sira ne’ebé la’ós okupa kargu xefia, maibé pertense ba área sira konsidera altu risku ba korrupsaun.
Nune’e mós, ba funsionáriu sira ne’ebé iha área serbisu hanesan impostu, aprovizionamentu ba kontratu públiku, jestaun rai ho inspesaun tenke aprezenta mós deklarasaun.
Notísia relevante: CAC rekolla koima $93.321,87 husi infratór aprezenta deklarasaun rikusoin tarde
Jornalista: Nelson de Sousa
Editora : Isaura Lemos de Deus
