KOVALIMA, 14 Abríl 2026 (TATOLI)- Ministériu Transporte no Komunikasaun (MTK) entrega rede internet starlink ba autoridade Munisípiu Kovalima atu fasilita sevisu administrasaun iha Munisípiu Kovalima.
Objetivu entrega rede internet starlink ba Autoridade Kovalima atu halo instalasaun ba iha suku sira hodi garante servisu Administrasaun liuhusi sistema online liuliu iha iha sistema Integradu Jestaun Suku no Aldeia nune’e sira bele atualiza dadus ho lais iha munisípiu Kovalima.
“Suku balun ami kobre ho fibraoptika ho ida-ne’e ita hakarak kompleta polítika Governu da-sia liuliu ba sistema integradu jestaun suku importante sai sasukat ba dadus real husi área rurál ba nasionál ita atu hatene totál populasaun liuhusi online presiza Infraestrutura”, Diretór Nasionál Infraestrutura (MTK), Ambrósio Manuel Barreto Amaral, hato’o liuhusi nian dirkursu iha salaun AMC-Suai.
Diretór mós husu ba Autoridade Kovalima bainbira uza presiza atu kuidadu bainhira xefe suku iha programa fasilita formasaun ba joven sira depende husi Xefe Suku sira hodi ínternet ba buat ne’ebé pozitivu.
MTK nia papél importante oinsá garante Infraestrutura hodi haree liu ba konesaun rede internet ba Govermu ajénsia no ba xefe suku sira.
“Ita nia postu administrativu hitu iha munisípiu Kovalima ita dada ona fibraotika no ita sei dada direta fiu husi munisípiu ba iha postu administrativu sira maibé ita sei prosesu neneik importante mak iha suku 30 iha kovalima molok 30 Abríl ita halo ona konesaun ba rede internet”, nia promete.
Ho nune’e, Nia dehan ekipa sira hahú instala ona liña starlink ba iha suku Ualu iha postu administrativu Zumalai, hafoin kontinua instala iha postu administrativu sira seluk ne’ebé mak pertense ba munisípiu Kovalima.
Iha fatin hanesan, Reprezentante Prezidente Autoridade Munisípiu Kovalima, Alberto Moniz de Araújo, agradese ba MTK tanba rede internet importante atu fasilita komunidade sira.
“Instalasaun rede internet importante tama mós iha avaliasaun kondisaun mínima atu simu podér lokál,” nia dehan.
Munisípiu Kovalima iha nia postu Administrativu sira hanesan, Fatululik, Fatumea, Fohorem, Tilomar, Maucatar, Suai no Zumalai ho nia suku 30 Aldeia 148.
Jornalista:Celestina Teles
Editór: Florencio Miranda Ximenes
