DILI, 16 Abríl 2026 (TATOLI)—Primeiru-Ministru, Kay Rala Xanana Gusmão, hateten Governu foti ona desizaun klaru fó tempu loron 10 ba Empreza Pelican Paradise atu hamamuk fatin.
Notísia Relevante: Governu kansela investimentu Pelican Paradise
“Iha ona rezolusaun ida atu Vise-Primeiru-Ministru, Francisco Kalbuadi Lay atu kontakta ho Pelican Paradise hodi konkorda malu fó loron 10 sira atu sai. Hamamuk fatin atu ema seluk bele tama fali,” Xanana Gusmão hateten ba Jornalista sira iha Palásiu Prezidensiál Nicolau Lobato, Bairru Pite, hafoin hala’o enkontru semanál ho Xefe Estadu José Ramos-Horta, kinta ne’e.
Nia dehan, bainhira investór seluk atu tama bele ajuda preparasaun Timor-Leste nian bainhira sai uma-na’in ba simeira ASEAN 2029.
Nia hatutan, Governu kumpre hotu ona saida mak Pelican Paradise husu oinsá halo instalasaun eletrisidade no dada bee-moos ba fatin Pelican Paradise nian iha Tibar.
“Ita responde ona, dada ona eletrisidade, dada ona bee ba, agora nia husu tan osan rihun balun tan atu sai hanesan garantia iha banku. Be ó investór boot ida osan laiha, ah, ne’e labele,” Xanana dehan.
Antes ne’e, projetu Pelican Paradise iha Timor-Leste nu’udar investimentu boot ida ho valór maizumenus millaun $700 hodi harii kompleksu resort fitun lima, kampu golf no instalasaun sira seluk iha área Tasi-Tolu to’o Tibar.
Projetu ne’e, jere husi empreza Singapura Pelican Elior Hotel, Unip. Ltd., hetan aprovasaun iha 2018, maibé hetan ona atrazu sira iha implementasaun no problema sira progresu nian, ne’ebé hamosu apelu sira atu kansela kontratu.
Pontu Xave sira Projetu Pelican Paradise nian:
Totál Investimentu: Kalkula ba tokon $700 USD, ho valór espesífiku ba área Tasi-Tolu nian maizumenus tokon $110 USD.
Fatin & Dimensaun: Lokaliza iha Tasi-Tolu (Dili) to’o Tibar (Liquiça), nia luan fiktar 550-558.
Fasilidade sira: Otél ho fitun lima, kampu golfe, rezidensiál, no instalasaun komersiál sira.
Impaktu Empregu: Faze dahuluk hein atu emprega maizumenus traballadór lokál 1,000.
Estatutu Atuál (2026): Governu Timor-Leste hanoin hela atu kansela projetu ne’e tanba laiha progresu ne’ebé signifikativu, ho FONGTIL dudu atu tau empreza ne’e iha lista negra.
Projetu ne’ebé iha inísiu hetan apoiu liuhusi Trade Invest Timor-Leste, renova beibeik ona ninia kompromisu maibé hetan kontratempu iha implementasaun iha terrenu.
Notísia Relevante: MJ halo levantamentu ba uzu propriedade Pelican Paradise molok aprezenta ba KM
Jornalista : Hortêncio Sanchez
Editór : Cancio Ximenes
