BOBONARU, 16 Abríl 2026 (TATOLI)- Institutu Jestaun Ekipamentu Apoia Dezenvolvimentu Infraestrura (IGEADI) Brigada Maria-Tapo planu sei responde pedidu normalizasaun estrada no ponte iha fulan maiu 2026.
Koordenador IGEADI Brigada Maria-Tapo, Custodío Pereirra konfirma ekipa brigada Maria-Tapo simu ona pedidu normalizaun rua ida husi postu Administrativu Atabae no ida husi Kailaku.
Notísia Relevante:IGEADI orienta Brigada Bobonaru hasai sedimentasaun iha Estrada protokolu Karimbala
“Normaliza estrada ami hein de’it bai-loro, hanesan maiu ba leten ami bele atende ona, pedidu iha balu Atabae nia, balu Kailaku nia, tanba durante ne’e udan ita labele halo buat ida,” informa Custodío ba jornalista sira, iha kna’ar-fatin foin lalais ne’e.
Hahú husi Janeiru to’o marsu ne’e, koordenadór Custodío Pereirra, haktuir Brigada Maria-Tapo halo normalizasaun emerjensia dala tolu ba estrada iha merkadu Asudai, suku Malilait, estrada no ponte kotu iha área Hali-Mesak, suku Odomau, inklui Ponte Bolulobu iha área Samutaben, suku Manapa, Postu Administrativu Kailaku no inundasaun iha fatin seluk tan.
Komunidade Bobonaru, Costantino de Jesus Lopes, fiar katak brigada Maria-Tapo sei halo intervensaun ba infraestrutura bazíka hanesa ponte no estrada sira ne’ebé hetan estragus hafoin akontese udan-bo’ot foin lala’is ne’e.
“Iha Munisípiu Bobonaru estrada no ponte ki’ik sira barak mak a’at, se bele hare mós ki’ik sira ne’e atu nune’e bele fasilita movimentasaun tranporte públiku no privada, tanba tempu bai-loro ne’e aktividade ekonomía la’o maka’as los, se estrada la di’ak oinsa sira atu asesu ba merkadu,” nia dehan.
Enkuantu IGEADI (Instituto de Gestão de Equipamentos e Apoio ao Desenvolvimento de Infraestruturas, Instituto Público) mak instituisaun públika ida iha Timor-Leste, ne’ebé hamahan an iha Ministériu Obras Públikas (MOP), ho knaar prinsipál atu jere ekipamentu pezadu no apoia dezenvolvimentu infraestruturas iha rai laran.
Notísia Relevante:IGEADI simu pedidu normalizasaun estrada 52 iha Bobonaro
Funsaun prinsipál IGEADI nian mak hanesan:
- Jestaun Ekipamentu Pezadu: Jerál, manutensaun, no uza ekipamentu pezadu sira
- Apoiu Emerjénsia: Fó apoiu intervensaun urjente iha situasaun dezastre naturál, hanesan inundasaun no rai-monu, inklui reabilitasaun estrada no ponte.
- Dezenvolvimentu Infraestruturas: Fasilita no apoia konstrusaun estrada alternativa, harii monumentu, no projetu infraestruturas báziku seluk.
- Kapasitasaun no Sertifikasaun: Prepara timoroan sira liu husi formasaun no sertifikasaun kompeténsia ba operadór ekipamentu pezadu sira.
- Normalizasaun Estrada : Halo manutensaun no hadi’a estrada aat sira atu fasilita mobilidade komunidade nian, liuliu estrada rurál sira.
Jornalista : Sergio da Cruz
Editora : Armandina Moniz
